«2015 jyly folklorlyq ansambl qurýǵa nıettenip, osy turǵyda jumys istedik. Nátıjesinde, «Úsh qońyr» folklorlyq-etnografııalyq ansambli qurylyp, 42 shtatpen tolyqty. Osydan keıin aýdandyq mádenıet úıiniń sol kezdegi rejısseri Baǵlan Qalmanov teatr ashý jóninde usynys aıtty. Sodan bastap talantty jastardyń atsalysýymen alǵashqy spektakldi daıyndadyq. Ol kezde aramyzda dıplomy bar bir ǵana teatr akteri Álisher Muqashov boldy. Qarasaı aýdanynyń 90 jyldyq mereıtoıyna oraı jazýshy Naǵashybek Qapalbekulynyń «Qarasaı batyr» atty dramasymen teatrdyń tusaýy kesildi. Rejısser Baǵlan Maratuly qoıǵan teatrdyń qanatqaqty bul spektakli kásibı turǵyda joǵary baǵalanyp, bolashaǵyna jarqyn jol ashty», – deıdi teatr negizin qalaýshy, aýdandyq mádenıet, tilderdi damytý, dene shynyqtyrý jáne sport bóliminiń basshysy Kúljan Dúısenova.
Kórermen júregine jol tapqan tuńǵysh qoıylymy sátti shyqqan teatr ónerpazdary qanatyn qomdap, dramatýrg Jabal Erǵalıevtiń «Jan shyryly» pesasyn daıyndady. Spektakl arqyly qoǵamda beleń alǵan keleńsizdikterdi qozǵap, dabyl qaqty. Osylaısha, judyryqtaı jumylyp, óz aldyna ujym bolyp qalyptasqan ónerli jastar kásibı akterlerdiń deńgeıine jeteǵabyl jumys jasaýǵa tósele bastaǵandaryn baıqatady.
«Qarasaı jastary» teatry Abaı Qunanbaıulynyń 175 jyldyǵyna oraı Baqyt Bedelhanulynyń «Rýh jyry» poemasynyń jelisi boıynsha «Júrektiń kózi ashylsa...» atty poetıkalyq dramasyn usyndy. Talantty rejısser Baǵlan Maratuly sahnalaǵan qoıylym 2021 jyly Taldyqorǵan qalasy Súıinbaı atyndaǵy Almaty oblystyq fılarmonııasynda «Halyqtyq jáne jańadan qurylǵan halyqtyq ataǵy bar» teatr festıvaline qatysyp, 32 teatrdyń arasynan top jaryp, bas júldeni ıelengenin erekshe ataǵan jón.
Odan keıingi kezekte dramatýrg Tólen Ábdiktiń «Biz úsheý edik» dramasyn da sátti sahnalaǵan óner ujymy eki jyl buryn Ǵabıt Músirepov atyndaǵy Qazaq memlekettik akademııalyq balalar jáne jasóspirimder teatrynda aqyn, dramatýrg, Halyqaralyq «Alash» ádebı syılyǵynyń laýreaty Baqyt Bedelhannyń «9 gramm...» ıntellektýaldy-poetıkalyq spektaklin sahnalady. Qoıylymǵa kelgen kórermennen ıne shanshar oryn bolmady. Qazaqstannyń Eńbek Eri Asanáli Áshimov jastar teatryna alǵys aıtyp, batasyn bergen bolatyn. Spektakldi rejısser Juldyzbek Jumanbaı sahnalasa, sazger Qanat Ibragımov dybyspen kórkemdep, kórermenniń ystyq yqylasyna bólendi. Sondaǵy jas akterlerdiń kıeli sahnadaǵy sheberlikteri men tabandylyqtaryna dúıim jurt tik turyp qoshemet kórsetip, qol soqqan edi.
«Nar táýekelmen» salmaqty spektaklder sahnaladyq. Sóıtip, sheberligimiz shyńdala tústi. Ýaqyt óte kele balalarǵa arnalǵan «Bremen mýzykanttary», «Batyl kójekter», «Qadyrdyń baqyty», «Aldar kóse», «Qustar festıvali» atty ertegilermen kishkentaı kórermenderdi qýantyp kelemiz. Kórermenderdiń kóńilin serpiltý maqsatynda Á.Orazbaev aýdarǵan S.Lobozerovtiń «Qaladan kelgen meıman» komedııalyq spektaklin sahnaladyq. Qoıylym rejısseri Álisher Muqashov boldy. Búginde teatrda rejısser Jasulan Zamanbek, teatr akterleri Jarqyn Raqymqash, Abzal Ábdihan, Janar Berik, Shynar Berjanova, Dana Erǵazına, Aıman Rahymberdıeva, Nurbek Alpysbaı, Madııar Ornyqbaı, operator Nurzat Qasqabaev syndy talantty jastar jumys isteıdi», deıdi teatrdyń kórkemdik jetekshisi Nurbol Dańǵyl.
Alaıda sútteı uıyǵan ujymnyń kem-ketigi de joq emes. Eń aldymen, halyqtyq ónerdi óristetip júrgen teatrǵa keregi shtat birlikteri bolsa, ekinshiden, gastroldik saparǵa shyǵýǵa avtobýstyń joqtyǵy úlken kedergi ekeni jasyryn emes. Teatr negizi qalanǵaly beri kostıýmderi de jańarmaǵanyn jasyrýǵa bolmas. Soǵan qaramastan ult rýhanııatynyń shynaıy qazynasyn baıytyp, qanatyn keńge jaıǵan «Qarasaı jastary» teatrynyń jeti jylda jetken jetistikteri kóńil kónshitedi.
Almaty oblysy,
Qarasaı aýdany
