Jarysqa Almaty oblysynyń birneshe óńirinen, Almaty, Qonaev qalalarynan kásibı balyqshylar qatysty. Barlyǵy 15 komanda (árqaısysy 3 adamnan) jeke jáne komandalyq esep boıynsha ózara synǵa tústi. Birinshilik 5 saǵatqa sozyldy. Nátıjesinde, eń úlken balyq aýlaǵan balyqshy E.Kembaev «Big Fish» JShS-nyń arnaıy júldesin jeńip aldy. Komandalyq esepte «Qonaev-3» komandasy 3-oryndy, «Naýtılýs» komandasy 2-oryndy, «Feeder.kz» komandasy 1-oryndy qanjyǵasyna baılady.
«Federasııanyń qurylǵanyna bir jyldan endi asty. Osy ýaqyt ishinde músheler sany aıtarlyqtaı artty. Jylyna 6-7 ret balyq aýlaý jarysyn uıymdastyryp otyramyz. Bul joly qoldaý kórsetken Qonaev qalasy ákimdigine alǵys bildiremiz», dedi federasııa basshysynyń orynbasary Damır Sergibaev.
Jarys barysynda barlyq qaýipsizdik talaptary saqtaldy, muzdyń qalyńdyǵy 70 sm boldy. Aıta keterligi, balyqshylar demalystan keıin sýqoımasynyń ústindegi qoqystardy jınap ketýge mindetti. Tabıǵatqa janashyrlyq ár demalýshynyń jaýapkershiliginen bastalady. Qorshaǵan ortany lastaǵanǵa ákimshilik jaza qarastyrylǵanyn árdaıym este ustaǵan jón.
Almaty oblysy
