Sýret: halyq-uni.kz
Ertis-Baıan óńiriniń kókónis ósirýshileri byltyr 176 myń tonna sábiz jınapty. Bul kólem elimizdiń barlyq óńirin qamtýǵa jetkilikti. Alaıda áleýmettik jelide pavlodarlyq fermerler óz ónimderin elimizdiń ońtústik óńirlerine jibere almaı otyrǵanyn, sebebi Reseıdiń arzan kókónisi aımaqtardy jaýlap alǵanyn jazyp jatyr. О́ndirýshiler sábizdiń kılosyn tipti 65–85 teńgeden ótkize almaı otyrmyz dep muń shaǵady. Áleýmettik jelide tarap ketken beınejazbadan kókónis saqtaý qoımalarynda taý-taý bolyp úıilip jatqan sábizdiń buzyla bastaǵanyn kórýge bolady.
Agroónerkásip keshenindegi aýmaqtyq ınspeksııanyń resmı málimetine súıensek, Pavlodar oblysyna ózge memleketterden sábiz ákelinbegen.
«О́ńirlik Aýyl sharýashylyǵy basqarmasynyń mamandary «Rahmet» bazaryna monıtorıng júrgizip, ondaǵy sábizdiń jergilikti kókónis ósirýshilerden ǵana kelip túsetinin anyqtady. Fermerlerdiń qoımalarynda sábiz barshylyq. Aýyl sharýashylyǵy basqarmasy ónimdi syrtqa satýǵa kómek kórsetý týraly Aýyl sharýashylyǵy, Saýda jáne ıntegrasııa mınıstrlikterine, oblys ákimdikteri men áleýmettik-kásipkerlik korporasııalaryna hat jazdy. Onda sábizdiń kólemi men sharýa qojalyqtarynyń baılanystary kórsetilgen», dep habarlady Pavlodar oblysy ákiminiń baspasóz qyzmeti.
Aýyl sharýashylyǵy basqarmasy basshysynyń orynbasary Tólegen Kósherbaev jaǵdaıdyń mundaı bolatynyn jyl basynda-aq boljaǵan edik deıdi. Jaýapty vedomstvolarǵa hat jazylǵanymen, naryqta ázirge ózgeris baıqalmaıdy. Sharýalar byltyr jınaǵan ónimniń 100 myń tonnasyn ǵana satyp úlgergen.
«О́kinishke qaraı, Pavlodar, Aqtoǵaı, Jelezın aýdandary men Aqsý qalasynyń aýyldyq aımaǵyndaǵy kókónis saqtaý qoımalarynda 50 myń tonna sábiz qalyp otyr. О́ńir turǵyndary bir jylda shamamen 17 myń tonna, onyń ishinde qys pen kóktem kezeńinde 10 myń tonna sábiz tutynady. Jergilikti naryqtaǵy ónimniń barlyǵy ózimizdiki», deıdi mekeme ókili.
Sharýalar Úkimet ózge eldermen baılanys ornatyp, shuǵyl túrde eksport máselesin sheship berse degen tilek aıtady. Bolmaǵan jaǵdaıda, ónim kún jylyna buzylyp, tutynýǵa jaramsyz bolyp qalady. Qazirdiń ózinde qoımalar olardy irikteýge kóshken. Aıtpaqshy, kórshi eldiń resmı aqparat quraldaryna qulaq túrsek, qańtarda Reseıdiń Volgograd oblysynan 880 tonna sábiz elimizge satylǵan. Al 2024 jyly О́zbekstan Qazaqstanǵa 50 myń tonnadan astam sábiz eksporttaǵan. Bir ǵana Pavlodar oblysy respýblıkada ósip shyǵatyn sábizdiń 40 paıyzyn berip otyrǵanyn aıtýymyz kerek. Al ol kólem el halqynyń suranysyn artyǵymen oryndaıdy.
Biraq baǵa jaǵynan alǵanda Reseıdiń ónimi otandyq ónimnen arzan. Kórshilerde kartoptyń kóterme baǵasy – 11 rýbl (61 teńge). Soǵan oraı otandyq ónim iri dúkender jelisinen tyqsyrylyp qalyp jatyr.
Pavlodar oblysy
