Sýret: ru.wikipedia.org
«El jastarynyń birligi – bereke bastaýy» ataýymen ótken kezdesýge «Aýyl» partııasynyń tóraǵasy, Májilis depýtaty Serik Egizbaev, Májilistegi «Aýyl» partııasy fraksııasynyń depýtaty Nıkolaı Arsıýtın, elimizdegi túrli etnos ókilderi qatysty.
– Kez kelgen memleketti áýeli ekonomıkalyq, saıası áleýetimen baǵalaımyz. Alaıda eldiń eń birinshi baılyǵy – jergilikti turǵyndary. Sol mekendegi yrzyqty, murany, ulttyq qundylyqty saqtap, jetkizýshi, onyń óristeýine negiz bolatyn da halqy. Ata-babamyz bizge baǵa jetpes birlikti, yntymaqty mura etip qaldyrdy. Ony saqtap, ári qaraı eselep, álemge úlgi etý búgingi jastardyń muraty bolýy kerek. QHA osy mıssııany oryndaýda ózindik úles qosyp keledi, – dedi S.Egizbaev.
«Aýyl» partııasy Assambleıanyń mıssııasynda aıqyndalǵan memlekettik saıasattyń strategııalyq baǵyttaryn únemi qoldap keledi. Máselen, partııa músheleriniń 20%-ǵa jýyǵy, Parlament Májilisindegi depýtattardyń 12%-y, máslıhat depýtattarynyń 10%-y – túrli etnos ókilderi. Kezdesýde de ózge etnos jastary partııa músheligine ótti. Olardyń arasynda nemis qyzy Albına Devıvye bar.
– Qaraǵandy oblysy Qarqaraly aýdanynyń Qarakól aýylynda, qarapaıym sharýanyń otbasynda dúnıege keldim. Ákem Vıtalıı, anam Natalıa ekeýi bes balanyń jarqyn bolashaǵy úshin tań atqannan kesh batqanǵa deıin tynym tappaı qoı-eshkini baǵyp, eńbek etip keledi. Keńes odaǵy ydyraǵan tusta, ákemniń týystary Germanııaǵa kóship jatqanda, óz týǵan jerin, aýylyn qımaı qalyp qoıǵan. Es bilgeli qazaqy tárbıeni kórip, salt-dástúrine qanyǵyp óstik. Qazaq mektebine baryp, tipti qazir E.A.Bóketov atyndaǵy Qaraǵandy ýnıversıtetiniń jýrnalıstıka fakýltetinde qazaq tobynda oqımyn. Men de partııadaǵy aǵa býyn ókilderi sekildi Prezıdent bastamalarynyń júıeli iske asyrylýyna úlesimdi qosqym keledi, – deı kele ol baldyrǵandardyń ózge tilde shúldirleýine alańdaýshylyq bildirdi.
О́z kezeginde partııa basshylyǵy aldaǵy depýtattyq saýaldarda usynystardyń eskeriletinin jetkizdi.
