Kúni keshe Túrkistan qalasynyń ákimi Ázimbek Pazylbekuly álemniń túrli elderindegi qolónershiler men qolónerdi biriktirýshi – «World Craft Council» halyqaralyq uıymynyń sarapshylarymen kezdesti. Túrkistanǵa arnaıy kelgen Dúnıejúzilik qolóner keńesiniń Azııa-Tynyq muhıty aımaǵy boıynsha vıse-prezıdenti Aıdarhan Kalıev pen sarapshylary úndistandyq Sohan Kýmar Dja, túrkııalyq Mahootchıan Iаlda, Dúnıejúzilik qolóner keńesiniń Ońtústik-Shyǵys Azııa aımaǵy boıynsha vıse-prezıdenti jáne sarapshysy Le Ba Ngok qalanyń qolóner salasynyń damýymen tanysyp, tájirıbelerimen bólisti. Sonymen qatar «qolónershiler qalasy» mártebesine ıe bolýy úshin atqarylatyn jumys baǵyttary men saladaǵy yntymaqtastyq jaıy talqylandy.
Ázimbek Pazylbekuly san ǵasyrlyq tarıhy bar, mádenıeti men óneri ushtasqan qasıetti shahar týraly baıandap, «Halyqaralyq qolónershiler qalasy» mártebesin alýdyń mańyzyna toqtaldy. «Uly Jibek jolynyń mańyzdy ortalyqtarynyń biri bolyp, ejelden qolónerdiń damýyna úlken úles qosqan Túrkistan atalǵan mártebeni alýǵa nıetti. Búginde qalamyzdyń qolóner salasy óziniń tereń tamyry men ulttyq erekshelikterin saqtaı otyryp, zamanaýı úrdistermen úılesimdi damyp keledi. Túrkistandyq sheberler jasaǵan keramıkalyq buıymdar ózderiniń ásemdigimen, naqyshty órnekterimen jáne sapasymen erekshelenedi. Aldaǵy ýaqytta qolónershilerdi qoldaýǵa baǵyttalǵan úlken jobalarymyz bar», dedi qala ákimi.
Sondaı-aq basqosýda Dúnıejúzilik qolóner keńesiniń Azııa-Tynyq muhıty aımaǵy boıynsha vıse-prezıdenti Aıdarhan Kalıev qala ákimine alǵys aıtyp, Túrkistanmen yntymaqtastyqty damytýǵa daıyn ekenin jetkizdi. Túrkistanǵa «Halyqaralyq qolónershiler qalasy» mártebesin alý ortaq maqsat ekenin jetkizip, osy jolda birlesip jumys isteýge nıet bildirdi.
