Sýretti túsirgen – avtor
Ár beısenbi saıyn uıymdastyrylǵan tazalyq aksııasyna jas ta, kári de tartyldy. Senbilikpen ǵana shektelip qalǵan joq, turǵyndar ala jazdaı, apta saıyn tazalyq jumysymen aınalysty. Mekemelerdiń mańaıy, úı-jaıdyń aınalasy ǵana emes, tabıǵat aıasyndaǵy qoqystar da qapqa qattalyp, tıisti oryndarǵa jóneltildi. Sóıtip, ár beısenbi óńir turǵyndary úshin merekege aınaldy.
Kóktem shyǵa О́skemenniń irgesindegi Aqbaýyr tarıhı-arheologııalyq kesheninde júrgizilgen tazalyq jumystaryna, Ulan aýdany aýmaǵyndaǵy aksııaǵa jergilikti azamattar ǵana emes, óskemendikter de úles qosty. Eriktiler, ákimdik qyzmetkerleri, týrızm salasynyń mamandary bas biriktirip, tarıhı keshenniń mańaıyn muntazdaı etti. Tazalyq jumystarynan soń qorshaýdyń boıyna kóshet egip, keshenniń sánin kirgizdi. Sol kóshetter kúzge deıin jaıqalyp, jasyl jelekke aınalyp úlgerdi. Belsene qatysyp júrgen eriktiler bul sharanyń tárbıelik máni bar ekenin aıtady.
– Ekologııalyq aksııa bastalady degendi estigende erekshe qýandyq. О́ıtkeni tabıǵatta qoqystyń shashylyp jatqanyn janymyz súımeıdi. Qalanyń ishi ǵana emes, syrtyna deıin tazaladyq. Qalanyń kórikti jeri – Qazaqstan taýyndaǵy tazalyq jumystaryna da belsene úles qostyq. Qazirde dalaǵa bos bótelke turmaq, bir japyraq qaǵaz tastaǵymyz kelmeıdi. Demek aksııaǵa qatysqan ár jas tabıǵatty aıalaýdy, qorshaǵan ortany qorǵaýdy, eńbekti baǵalaýdy kóńilderine myqtap túıdi, – deıdi О́skemenniń belsendi jastarynyń biri Aıan Qalymbek.
Jalpy, el kóleminde keńinen qanat jaıǵan aksııaǵa oblysta 541 myńnan astam adam qatysyp, 6,6 myń tehnıka tartyldy. 204 saıabaq pen skverlerdiń mańaıy abattandyryldy. 323 tarıhı-mádenı eskertkish, 859 áleýmettik nysannyń mańy tazalandy. О́zen-kólderdiń jaǵalaýy da nazardan tys qalmady. Uzyn sany 83 myń aýladan 29 myń tonna qoqys shyǵaryldy. 110,5 myń túp kóshet otyrǵyzyp, aınala jasyl jelekke orandy. «Taza beısenbi», «Taza aımaq», «TazaLike» syndy shaǵyn aksııalar turaqty uıymdastyryldy. Aksııa bıyl da josparly túrde, júıeli jalǵasyn tabady.
Shyǵys Qazaqstan oblysy
