Foto: globallookpress.com
Máselen, Shymbulaqqa kúnine 4 myńǵa jýyq adam keledi. Demalýshylardyń deni sol mańdaǵy Bogdanovıch muzdyǵyna jaıaý shyǵady. Dál osy jerde qar kóshkininiń yqtımaldyǵy joǵary. Ondaǵy qardyń qalyńdyǵy 80 santımetrden 1,5 metrge deıin jetedi. Osyǵan oraı «Qazseldenqorǵaý» mekemesi «Shymbulaq» taý-shańǵy kýrortynda qar kóshkininiń aldyn alý sharalaryn júrgizdi. Oǵan qutqarý qyzmeti men Tótenshe jaǵdaılar departamentiniń 30-ǵa jýyq qyzmetkeri qatysty. Shańǵy joly túgeldeı jabyldy. Eń qaýipti degen jerler Talǵar asýynda teńiz deńgeıinen 3200 metr bıiktikte ornalasqan. Dál sol mańǵa jarylǵysh zattar qoıylyp, qar túsirý jumystary júrgizildi.
Sala mamandarynyń aıtýynsha, mundaı 165 qaýipti aımaq bar. Qar kóshkini qaýpi sáýir aıynyń sońyna deıin saqtalady.
«Bul aımaqtardyń barlyǵy qaýipti sanalady. Atap aıtatyn bolsaq, Kishi Almaty ózenindegi Shymbulaq, Medeý shatqaly jáne Tuıyqsý, Úlken Almatymen alatyn bolsaq, Kosmostansııa joldary – barlyǵy qar kóshkini oryn alýy múmkin aımaqqa jatady. Búgingi tańda biz solardyń aldyn alý úshin barlyq qar kóshkini bar aımaqtarda aqparattyq shıtterdi ornattyq», deıdi «Qazseldenqorǵaý» MM Almaty fılıalynyń basshysy Samat Dáýlenqanov.
