Foto: Aqorda
Qasym-Jomart Toqaev Pamela Harrıske iltıpat bildirip, jaýapty qyzmetke saılanýymen quttyqtady. Sonymen qatar onyń tájirıbesi Uıym qyzmetine tyń serpin beretinine senim bildirdi.
Prezıdent quqyqtyq memleket qurýda zań ústemdigin qamtamasyz etý men sot júıesin reformalaýdyń sheshýshi mánge ıe ekenin atap ótti.
«Biz «Zań jáne tártip» qaǵıdatyn ornyqtyrýǵa baǵyttalǵan óte mańyzdy reformalardy qolǵa aldyq. Zań ústemdigi qoǵamǵa dendep enýge tıis dep sanaımyz. Meniń oıymsha, bul elimizdiń turaqtylyǵy men ósip-órkendeýi úshin óte ózekti. Sondyqtan Halyqaralyq qaýymdastyq Qazaqstanmen, elimizdiń sot júıesimen tyǵyz qarym-qatynasta jumys isteýi kerek», dedi Memleket basshysy.
Pamela Harrıs elimizde júrgizilip jatqan quqyqtyq reformalardy joǵary baǵalap, yntymaqtastyqty jalǵastyrýǵa ázir ekenin jetkizdi. IASA prezıdentiniń aıtýynsha, Sot ákimshiligi men Joǵarǵy sottyń fýnksııalaryn bólý álemdik tájirıbedegi anaǵurlym tıimdi sheshimderdiń biri. Ol Uıymnyń Qazaqstanmen baılanysty nyǵaıtýdy kózdeıtinine toqtalyp, ulttyq sot ákimshiligi ókilderiniń Qaýymdastyq jumysyna belsendi qatysqanyn aıtty.
Kezdesýde sot tóreligi júıesin reformalaýdyń negizgi aspektileri qarastyryldy. Budan bólek, sot organdary arasyndaǵy ózara yqpaldastyqty keńeıtýge, sot óndirisinde sıfrlyq sheshimderdi jáne jasandy ıntellektini qoldaný perspektıvasyna basa nazar aýdaryldy.
