Qazaqstanda 51 joǵary oqý orny alǵashqy áskerı daıyndyq páni boıynsha oqytýshylar daıarlaý lısenzııasyna ıe. Alaıda olardyń tek 41-inde ǵana áskerı kafedra bar. Ol kafedralarda oqıtyn stýdentterdiń jartysyna jýyǵy aqyly negizde bilim alady, bul olardyń daıyndyǵynyń tıimdiligine kúmán týdyrady. Sonymen qatar, biryńǵaı ádistemelik baza joq, zamanaýı oqýlyqtar jetispeıdi, al oqý baǵdarlamalarynda áli kúnge deıin kónergen kezeńdegi taktıka paıdalanylady.
«Búginde álemdik qorǵanys júıesinde aýqymdy ózgerister bolyp jatyr. «Qazirgi urystardyń ádis-tásilderi basqa, ásirese, gıbrıdtik soǵys túrleri keń taraýda. Shabýyldar áskerı ǵana emes, aqparattyq, psıhologııalyq, saıası ekonomıkalyq jáne basqa da sıpat alýy múmkin» degen Qazaqstan Prezıdenti joǵary tehnologııany meńgergen kásibı ásker daıarlaýdy tapsyrǵan bolatyn. Sondyqtan áskerı JOO men qorǵanys salasyna ushqyshsyz basqarylatyn ushý apparattary men zamanaýı tehnologııany jetik meńgergen ulttyq rýhtaǵy kásibı mamandardy kóptep tartý mańyzdy dep oılaımyz», dedi senator.
Senator saýalynda el mektepterindegi alǵashqy áskerı tárbıe jetkilikti deńgeıde berilmeıtinin de tilge tıek etti. Pánge arnalǵan kabınetterdiń materıaldyq bazalarynyń eski ári jattyǵý qarýlary saqtalatyn bólmeler, taktıkalyq alańdar men atys tırleri joq bolýy da saýalǵa arqaý boldy.
«Áskerı dalalyq jıyndar ótkizilmeıdi. Ataýyna «tehnologııa» sózi qosylyp, saǵaty qysqarǵan pán 10 synyppen shekteledi, 11 synyp oqýshylary UBT-ǵa daıyndalý úshin bosatylady. Elimizde 51 JOO bastapqy áskerı daıarlyq pániniń muǵalimin oqytýǵa lısenzııa bar. Osy mamandyqty oqyǵandar áskerge barmaı-aq pánniń muǵalimi bolyp shyǵady. О́zi sapqa turmaǵan, qolyna qarý ustamaǵan, temirdeı tártip kórmegen adam jastarǵa qalaı tárbıe beredi», dedi Senator.
Taqyryp aıasynda keleli máselelerdi kótergen Darhan Qydyráli, olardy sheshý jolynda bastapqy áskerı daıarlyq pániniń saǵaty men sapasyna mán berýdi usyndy.
