Jergilikti halyqpen tonnyń ishki baýyndaı aralasyp ketken dúngen jurtynyń ishinde qazaqtyń dástúrin berik ustanatyndar da jetkilikti. Tipti Ulystyń uly kúni Naýryz merekesin qazaqtarmen birge toılap jatqandaryn da san márte kórgenbiz. Olardyń qatarynda qazaq tilin erkin meńgergen azamattar barshylyq. Dúngen aýyldaryndaǵy qazaq mektepterinde memlekettik tilden sabaq berip júrgen ustazdardyń aıtýynsha, jasóspirimderdiń talaby men yntasy zor. Tipti qazaq tilin qazaqtardan bir mysqal kem bilmeıtinderi de jetkilikti.
Eki birdeı joǵary oqý ornyn bitirgen Vangar Voınse memlekettik tildi erkin meńgergen. Ara-tura qazaqtyń maqaldaryn qosyp sóz saptaǵanda, onyń tereńdigine tánti bolasyń. Bilgenin balalarǵa úıretýden jalyqpaıtyn ol qazirgi kezde Sortóbe aýylyndaǵy mektepte qazaq tili jáne ádebıeti pániniń muǵalimi bolyp eńbek etip júr.
«Áýeli Shymkent qalasyndaǵy Qazaq-Arab ýnıversıtetinde joǵary bilim aldym. Arab tili muǵalimi jáne dintanýshy mamandyǵy boıynsha joǵary oqýdy aıaqtaǵan soń, taǵy da oqýǵa tústim. Burynǵy Taraz memlekettik pedagogıkalyq ınstıtýtynda Qazaq tili men ádebıeti pániniń muǵalimi mamandyǵy boıynsha ekinshi joǵary oqý ornyn aıaqtadym. Memlekettik tildi bir kisideı meńgergennen keıin pedagog bolýǵa bet burdym. Aýyl jastaryna qazaq tilin úıretýdi ózimniń basty boryshym dep eseptedim. О́ıtkeni memlekettik tildi bilý – árqaısysymyzdyń paryzymyz», deıdi V.Voınse.
Aýyldan alystamaǵan azamat qazir Sortóbe aýylyndaǵy №16 Mıhaıl Lermontov atyndaǵy orta mektepte eńbek etip júr. Vangardyń aıtýynsha, aýylda tórt mektep bar bolsa, bilim ordasynyń biri – taza qazaq mektebi. Munda dúngen ultynyń balalary qazaq tilinde bilim alyp júr. Al qalǵan úsheýi aralas mektepter sanatyna jatady. M.Lermontov atyndaǵy orta mektepte 1 134 oqýshy bar. Olardyń barlyǵy memlekettik tildi meńgerýge den qoıǵan.
«Sortóbelik balalardyń qazaq tilin meńgerýge degen yntasy zor. Jergilikti jasóspirimdermen jumys isteý meni qanattandyrady, shabyttandyrady. Olardyń zeıinin ashý úshin qoldan kelgenshe jańashyldyqpen jumys istep jatyrmyn. Rasynda, qazaq tilin bilý, meńgerý – elge, memleketke degen qurmet. «Bir til bilseń – bir adamsyń, eki til bilseń – eki adamsyń» degen sóz – meniń ómirlik ustanymym», deıdi keıipkerimiz.
Dúngen ultynyń balalaryna qazaq tilinen sabaq berip júrgen Vangar Voınseniń tórt balasy da memlekettik tildi jatyq meńgergen. Ákesiniń izdenimpadyǵyna tánti bolyp ósken olar qaı kezde de bilimin jetildirýdi basty maqsaty dep sanaıdy.
«Biz úshin – Alǵys aıtý kúniniń máni zor deýge bolady. Qaı kezde de baýyrmaldyǵymen baýraıtyn jergilikti halyqqa degen rızashylyǵymyz sheksiz. Birligi myǵym eldi jaý da, daý da almaıdy. Sondyqtan da Jaratqan yntymaǵymyzdan aıyrmasyn degen tilek kókeıde atoılap turady. Tatýlyqty tý etken memleketimizdiń baǵyndyrar bıigi men alar asýy alda ekenine esh kúmán joq. Qaı kezde qoldan kelgenshe qoldaý kórsetetin qazaq halqyna alǵystan basqa aıtarymyz joq», deıdi V.Voınse.
Jambyl oblysy,
Qordaı aýdany,
Sortóbe aýyly
