Foto: Májilistiń baspasóz qyzmeti
3- naýryzda bastalǵan bul is-shara 6- naýryzǵa deıin jalǵasady.
Konferensııa aıasynda depýtat Halyqaralyq telekommýnıkasııa odaǵynyń (ITU) ókilderimen kezdesip, radıojıilik spektrin taratý, 5G jáne spýtnıktik tehnologııalardy engizý máselelerin talqylady. Sondaı-aq, radıojıilikterdi retteýdiń ozyq álemdik tájirıbesi men sıfrlyq transformasııa taqyrybyna arnalǵan paneldik sessııalarǵa qatysty.
Issapar barysynda Erbolat Saýryqov álemdegi jetekshi tehnologııalyq kompanııalar – Huawei, Siemens, Nokia jáne Ericsson basshylarymen kelissózder júrgizip, mobıldi jeliler, kıberqaýipsizdik jáne sıfrlyq ınfraqurylymdardyń turaqtylyǵy salasyndaǵy sońǵy ázirlemelermen tanysty. Kezdesýlerde kıberqaýipsizdik, paıdalanýshylardyń derekterin qorǵaý jáne telekommýnıkasııa salasynda ınnovasııalyq sheshimderdi damytý máselelerine erekshe nazar aýdaryldy.
Sonymen qatar depýtat TMD jáne Eýropa elderiniń retteýshi organdarynyń basshylarymen kezdesip, sıfrlyq tehnologııalardy retteý, radıojıilikterdi bólý jáne jelilik ınfraqurylymdarǵa jasandy ıntellektti engizý tájirıbesi boıynsha pikir almasty.
Kórmede Qazaqstannyń da qatysýy erekshe atap ótildi. «Qazaqtelekom» AQ jáne Kazdreem jekemenshik tehnologııalyq kompanııasy ózderiniń ozyq jetistikterin tanystyryp, halyqaralyq áriptestermen yntymaqtastyq ornatý boıynsha kelissózder júrgizdi.
«Qazaqstan telekommýnıkasııa salasynda úzdik álemdik tájirıbelerdi engizýge umtylady. MWC 2025 kórmesine qatysý – jańa tehnologııalardy zerdeleý, jıilik spektrin retteý jáne halyqaralyq yntymaqtastyqty nyǵaıtý úshin mańyzdy qadam», dedi Erbolat Saýryqov.
Konferensııa qorytyndysy boıynsha depýtat Qazaqstanda mobıldi salany damytý, radıojıilik spektrin bólý jáne kıberqaýipsizdik boıynsha usynymdar daıyndaýdy josparlap otyr.
