Sýret: gov.kz
Bul rette Sybaılas jemqorlyqqa qarsy qyzmettiń aýmaqtyq bólimshesi retinde Ulytaý oblysy boıynsha departament keshendi jumysty jalǵastyryp jatyr. Negizgi baǵyty – sybaılas jemqorlyq táýekelderiniń kartasyn iske asyrý, kúrdeli áleýmettik máselelerdi sheshý jolymen azamattardyń senimin arttyrý, basshy quram arasyndaǵy sybaılas jemqorlyq quqyq buzýshylyqtardy anyqtaý.
Departamenttiń prevensııa jelisi qyzmetine toqtalsaq, 2024 jyly bes salada sybaılas jemqorlyq táýekelderiniń syrtqy taldaýy júrgizilgen. Atap aıtqanda, taldaý avtojoldar salý jáne jóndeýden ótkizý, aýyl sharýashylyǵy jerlerin bólý, eńbek jáne áleýmettik qamtamasyz etý, sondaı-aq sport salalaryn qamtydy. Nátıjesinde, birqatar jemqorlyq táýekeli anyqtalyp, joıyldy.
Sý resýrstaryn basqarý, úı aýlalaryn abattandyrý, balalar oıyn alańyn ornatý, avtojol jóndeý jáne salý, aýyl sharýashylyǵy sýbektilerin sýbsıdııalaý, qorshaǵan ortaǵa zııandy zattardy taratý, qatty turmystyq qaldyqtar polıgondary jáne bilim ınfraqurylymyn qoldaý qorynyń qarajatyn jumsaý salalarynda sybaılas jemqorlyqqa qarsy monıtorıng júrgizildi. Monıtorıng nátıjeleri boıynsha jemqorlyqqa ákep soǵýy yqtımal máseleler anyqtalyp, sheshildi.
Sybaılas jemqorlyqqa qarsy is-qımyl agenttiginiń Ulytaý oblysy boıynsha departamentiniń basshysy Erlan Joldybaev:
– Memlekettik satyp alý salasyndaǵy monıtorıng aıasynda 1,3 mlrd teńge kólemindegi bıýdjet qarajaty únemdelip, 8 laýazymdy tulǵa tártiptik jaýapkershilikke tartyldy. О́tken kezeńde tyıym salynǵan qyzmetpen aınalysqany, kásipkerlik qyzmetti júzege asyrýǵa kedergi keltirgeni, sybaılas jemqorlyqqa qarsy sharalar qabyldamaǵany, buryn jemqorlyq jasaǵan adamdy jumysqa qabyldaǵany úshin 7 laýazymdy tulǵa ákimshilik jaýapkershilikke tartyldy. Departament usynysy negizinde ózge memlekettik organdar 7 jeke jáne zańdy tulǵalar 130 mln teńge kóleminde aıyppul túrindegi ákimshilik jaýapkershilikke, 17 laýazymdy tulǵa tártiptik jaýapkershilikke tartyldy, – deıdi.
«Bızneske jol» jobasy aıasynda 547 kásipkerdiń quqyǵy qorǵaldy, onyń 15-i júıeli keıs boıynsha iske asyryldy. Sybaılas jemqorlyqqa qarsy is-qımyl baǵytynda óńirdiń on ártúrli deńgeıdegi laýazymdy tulǵalary áshkerelenip, izdestirýdegi bir tulǵa ustalǵan. Sotqa deıingi tergeý baǵyty boıynsha 20 is sotqa joldanyp, Qylmystyq-prosestik kodekstiń 200-baby boıynsha 18 usynym engizildi. Tergeý barysynda zańdylyq pen obektıvtilikti qamtamasyz etýge asa nazar aýdarylatynyn atap ótken jón.
Prezıdent Qasym-Jomart Toqaevtyń tapsyrmasyna sáıkes, Sybaılas jemqorlyqqa qarsy qyzmet qurylysy uzaqqa sozylǵan nysandardy qadaǵalaıtyny belgili. 2024 jyly departament baqylaýynda tórt nysan boldy. Olarǵa jıi shyǵyp, qurylys barysy qadaǵalandy. О́tken jyldyń sońynda tórt nysannyń úsheýi qoldanysqa berildi. Bular – Jezqazǵan jáne Sátbaev qalalaryndaǵy eki balabaqsha, Sátbaev qalasyndaǵy Oqýshylar saraıy. Qazirgi ýaqytta departamenttiń baqylaýynda Jezdi kentindegi dene shynyqtyrý-saýyqtyrý kesheni qalyp otyr. Jyl basynda Jańaarqa aýdany Atasý kentindegi dene shynyqtyrý-saýyqtyrý kesheni baqylaýǵa alyndy.
Elimizdiń sybaılas jemqorlyqqa qarsy saıasatynyń 2022–2026 jyldarǵa arnalǵan tujyrymdamasyna sáıkes, byltyr memlekettik organdar men kvazımemlekettik sektor qyzmetkerlerine arnalǵan dárister jospar boıynsha júrgizildi. Sondaı-aq jemqorlyqqa qarsy taqyryptaǵy materıaldar qoǵamdyq oryndarda, áleýmettik jelilerde keńinen taraldy. Memlekettik qyzmetshiler úshin jemqorlyqqa qarsy taqyryptaǵy teatrlandyrylǵan qoıylym uıymdastyryldy.
Jastardyń sanasynda jemqorlyqqa qarsy mádenıet qalyptastyrýǵa baǵyttalǵan jumystarǵa da erekshe mán beriledi. Sonyń biri retinde «Jemqorlyq – indet, onymen kúresý – mindet» taqyrybyndaǵy stýdentter arasyndaǵy respýblıkalyq esse baıqaýyn aıtýǵa bolady. Oǵan elimizdiń birneshe óńirinen jastar qatysyp, baq synady. Jemqorlyq týraly oıyn jetkizip, oǵan qarsy turýdaǵy usynysyn ortaǵa saldy.
Buǵan qosa jyl basynan beri Memleket basshysy atap ótken «Zań men tártip» qaǵıdatyn qoǵamda nyǵaıtý boıynsha jumys júrgizilip jatyr. Búginge deıin 3 myńnan asa stýdent pen mektep oqýshysynyń qatysýymen «Tártipti ózińnen basta!» aksııasy ótkizildi.
Ulytaý oblysy
