«Men «kúsh mádenıeti» uǵymyn arnaıy ǵylym retinde damytýǵa kúsh salyp jatyrmyn. Máselen, qazirgi tańda kókparǵa qatysty tórt tomdyq kitaptarym ázir. Ol kitaptarda Abylaıhan men Qabanbaı, Bógenbaılardyń kókpar tartysqandary týraly derekter bar. Tarıhtaǵy kókparshy bolǵan palýan-batyr analarymyz da qamtyldy. Salaǵa qatysty tyń derekter men ınsaıttar óte kóp. Másele, tek shyǵarý men qarjyǵa kelip tirelip tur. Meniń maqsatym kókpardy ıdeologııaǵa aınaldyrý», dedi Abylaıhan Mamyraıhanuly.
Sondaı-aq ol qazirdiń ózinde óz avtorlyǵynda buǵan deıin jaryq kórgen «Balýan tas» qostomdyǵynyń úshinshi tomy, osy tomdardan órbigen «Balýandar álemi» kitaby, «Qazaq kúresiniń» balalarǵa arnalǵan oqýlyǵy men palýandyq pen batyrlyqty nasıhattaıtyn oqýshylarǵa arnalǵan 3 kitapshanyń ázir turǵanyn baıandady.
Aıta keteıik, Ulttyq sport túrleri men mádenıeti akademııasy – qazaq halqynyń barlyq dástúrli sportyn saqtaý, damytý jáne halyqaralyq deńgeıde tanymal etýge baǵyttalǵan ınnovasııalyq ortalyq. Bul akademııa ulttyq sport túrleriniń fızıkalyq, rýhanı-mádenı jáne zııatkerlik qundylyqtaryn zerttep zerdelep, bolashaq urpaqqa jetkizýdi jáne sport arqyly eldik rýhty kúsheıtýdi kózdeıdi.
Ulttyq akademııalyq kitaphananyń naýryz merekesine oraı belgilengen «Shańyraq» kúniniń mereıin asyrýǵa baǵyttalǵan is-sharasyna birqatar tanymal tulǵalar jáne mektep oqýshylary men stýdentter qatysty.
