Keshe Astanadaǵy Ulttyq mýzeıdiń baspasóz ortalyǵynda «Kazahstanskaıa pravda» gazetiniń qoldaýymen jaryq kórgen «Svet Pobedy» kitabynyń tusaýkeseri ótti. Atalmysh sharaǵa Ulttyq ulan Bas qolbasshysynyń orynbasary, polkovnık Muhamedqalı Satov, «Kazahstanskaıa pravda» respýblıkalyq gazeti» AQ basqarma tóraǵasy Aleksandr Tarakov, «Egemen Qazaqstan» respýblıkalyq gazeti» AQ-tyń vıse-prezıdenti-bas redaktor Janbolat Aýpbaev, Qazaqstan Respýblıkasy Ulttyq mýzeıiniń dırektory Darhan Myńbaı jáne Uly Otan soǵysynyń ardagerleri men BAQ ókilderi qatysty.
«Svet Pobedy» kitabyna «Kazahstanskaıa pravda» gazetinde Uly Otan soǵysyna qatysqan aıtýly tulǵalar men tyl eńbekkerleriniń erlikteri jáne elimizdiń búgingi Qarýly kúshteriniń áleýeti jóninde jarııalanǵan materıaldar toptastyrylypty. Jeńistiń 70 jyldyǵyna oraı shyǵarylǵan bul eńbektiń tusaýkeser rásiminde «Kazahstanskaıa pravda» gazetiniń basshysy Aleksandr Tarakov: «Biz bul kitapty shyǵarý arqyly jeńimpaz ardagerlerimizge degen qurmetimizdi bildirgimiz keldi. «Kazahstanskaıa pravda» basylymy 2004 jyldan bastap 1941-1945 jyldar aralyǵyndaǵy soǵys kezinde maıdanda jáne tylda erligimen tanylǵan qazaqstandyqtar jóninde úzbeı jazyp keledi. Bizdiń jýrnalısterimiz bul baǵyttaǵy jumystaryn óz erikterimen jalǵastyra beredi. О́ıtkeni, ardaqty ardagerlerimizdiń ónegeli jolyn, erlikti isterin keler urpaq bilip ósýi qajet», dedi.
Budan keıin sóz alǵan Ulttyq mýzeıdiń dırektory Darhan Myńbaı, Ulttyq ulan Bas qolbasshysynyń orynbasary, polkovnık Muhamedqalı Satov, «Kazahstanskaıa pravda» gazetiniń bas redaktory Tatıana Kostına jáne soǵys ardagerleri jańa kitap jóninde ózderiniń jyly lebizderin bildirdi.
О́z kezeginde Tatıana Kostına aldaǵy ýaqytta atalmysh kitaptyń jalǵasyn shyǵarý qajettigine nazar aýdardy. Al Muhamedqalı Satov ardagerlerdi Jeńistiń 70 jyldyǵymen quttyqtaı otyryp, tusaýy kesilgen jańa kitaptaǵy qundy derekterdiń mańyzdylyǵyn sóz etti. Sondaı-aq, ol osy eńbekti Ulttyq ulan sarbazdaryna mindetti túrde tanystyratynyn jetkizdi.
Shara barysynda «Kazahstanskaıa pravda» gazetiniń oqyrmandaryn kóbeıtý maqsatynda uıymdastyrylǵan «Seniń Túrkııaǵa joldamań» atty aksııanyń qorytyndysy shyǵaryldy.
Taǵy bir toqtala keter jaıt, osy kúni «Kazpravda» redaksııasynyń ǵımaratynda gazettiń Uly Otan soǵysynda qaza tapqan jýrnalısterine arnalǵan eskertkish taqta ashyldy.
Jıyn barysynda belgili bolǵandaı, soǵys kezinde bul basylymnyń 8 jýrnalısi Otan úshin janyn beripti.
Basylym basshysy Aleksandr Tarakov: «Soǵys kezinde bizdiń gazetimiz «Boevoı tovarısh ı drýg» degen atpen shyqqan eken. Alasapyran bastalǵan alǵashqy kúnnen gazet betinde halqymyzdyń basqynshylarǵa qarsy janqııarlyq kúresi týraly maqalalar, ocherkter, reportajdar úzdiksiz jarııalanǵan. Ondaǵy árbir materıal eldiń erik-jigerin janyp, jeńiske degen qulshynysty arttyrýmen boldy. «Kazahstanskaıa pravdanyń» kóptegen qyzmetkerleri maıdanǵa attandy. Olar qaıtyp oralmady. Bizdiń gazettiń ujymy sol bir aıaýly jandardy eshqashan umytpaıdy», dedi.
Aıta keteıik, bul eskertkish taqtanyń ashylý saltanatyna Leonıd Kartaýzov, Moıseı Goldberg jáne Qadan Bekenov syndy ardagerler qatysyp, ótken shaqtan syr tartyp, tárbıelik máni zor, kóńil tolqytar estelikter aıtyp berdi. Sondaı-aq, olar «Kazahstanskaıa pravda» gazetiniń keshegi soǵysta erlikpen qaza tapqan jýrnalısterine kórsetken qurmetteri úshin redaksııa ujymyna alǵystaryn bildirdi.
Joldybaı BAZAR,
«Egemen Qazaqstan».
Sýretterdi túsirgen
Erlan OMAROV.
