О́ńir tabıǵaty qyzyq. Ońtústik aýdandarda tal-daraq búrleıtin kez soltústikte muz kóbesi endi sógilgen sátpen tuspa-tus keledi. Sondyqtan da Jańaqorǵan, Shıeli aýdandarynyń turǵyndary «Taza Qazaqstan» respýblıkalyq aksııasy aıasyndaǵy senbilikte kógaldandyrýǵa atsalysty. Kóshelerge kóshet egip, aǵashtardyń túbin áktedi.
Qazalylyqtar Áıteke bı kentindegi «Qaramaıkól», «Qazaq» qorymy aınalasyndaǵy shashylǵan qoqystardy jınastyryp, arnaıy oryndarǵa shyǵardy. Aýdan ortalyǵyndaǵy T.Bóriqulaqov, Q.Pirimov, Janqoja batyr kóshelerinde de tazalyq jumystary qarqyndy júrgizildi. Aýdan turǵyndary da senbilikten syrt qalmaı, aýlalary men kóshelerin kúl-qoqystan tazartty.
Qarmaqshy aýdanynda uıymdastyrylǵan senbilikte aýdan mekemeleri men kásiporyndar, aýyldyq okrýg ákimdikteri, jastar, eriktiler kósheler men aýlalardy, saıabaqtar men qoǵamdyq oryndardy retke keltirip, qoqystardy jınady.
Jalaǵash kentinde kúz ben kóktemde kórshiler ózara kelisip, senbilikke kirisip ketetin kósheler bar. Júzden astam mekeme, 1 250 adam qatysqan tazalyq jumysy barysynda aýdan ákimi Ardaq Ibraımov tazalyqty árdaıym nazarda ustaıtyn S.Otarbaev kóshesiniń turǵyndarymen kezdesip, tabıǵat janashyrlaryna alǵysyn bildirdi.
«Yntymaǵy jarasqan bizdiń kóshede múmkindigi kelmeıtin nemese jumystan qoly tımeıtin kórshilerimizdiń de aýlasyn tazalap, qolǵabys jasaımyz. Osy joly kóshe jastary balalary oqýǵa qalaǵa ketken úılerdiń aldyn rettep berdi. Kúz ben kóktemde osyndaı senbilikterdi birlese uıymdastyramyz. Barlyq merekeni birge ótkizemiz», deıdi kent turǵyny Keńeskúl Qaıyrova.
Kenttegi senbilik barysynda kósheler men saıabaqtardaǵy qoqystar tazartylyp, qýraǵan taldar kesildi. Aryqtar tazartylyp, kúl-qoqystar belgilengen oryndarǵa shyǵaryldy. Ortaq iske kent, aýyldyq okrýgterdegi sharýa qojalyqtarynyń tehnıkalary jumyldyryldy.
Oblys ortalyǵyndaǵy senbilikke 128 mekemeden 1 872 adam qatysyp, 81 tehnıka iske qosyldy. Ortalyq polıgonǵa 300 tekshe metr qoqys shyǵaryldy.
Qala men aýdandardan 10 610 adam, 198 arnaıy tehnıka qatysqan «Taza Qazaqstan» aksııasy tazalyq ár adamnyń kúndelikti daǵdysy men ómir saltyna aınalyp kele jatqanyn kórsetedi.
QYZYLORDA
