Aýqymdy pedagogıkalyq jıynǵa Oqý-aǵartý mınıstrligi Orta bilim komıteti tóraǵasynyń orynbasary Jomart Qarambaev, «Qazaqstan halqyna» qoǵamdyq qorynyń basqarýshy dırektory Serikbek Elshibekov jáne Bilim berýdi turaqty damytý qory Qamqorshylyq keńesiniń tóraıymy Kúlásh Shámshıdınova qatysty.
Muǵalimdermen kezdesý barysynda NIS Basqarma tóraǵasynyń orynbasary Janbota Kabdykarımova Prezıdent Qasym-Jomart Toqaevtyń 2019 jylǵy Joldaýynda aıtylǵan mańyzdy mindetterdiń biri – qala men aýyl arasyndaǵy orta bilim sapasyndaǵy alshaqtyqty azaıtý qajettigin eske saldy.
«Memleket basshysy bul alshaqtyqtyń basty sebepteriniń biri retinde aýyldyq jerlerdegi bilikti pedagogterdiń tapshylyǵyn atap ótken bolatyn. Osy jaǵdaı NIS-tiń aýyl mektepterin qoldaýǵa arnalǵan aýqymdy jobasyn bastaýǵa túrtki boldy. Eger jobanyń bastapqy kezeńinde tek 5 mektep qamtylsa, qazir olardyń sany 135-ke jetti. Al jyl sońyna deıin 200-ge jýyq aýyl mektebin qamtý josparymyzda bar. Sondaı-aq tirek mektepterdiń muǵalimderi zamanaýı sıfrlyq múmkindikterdi paıdalana otyryp, «Kásibı ustaz» onlaın platformasy arqyly basqa óńirlerdegi áriptesterimen kásibı tájirıbe almasýdy jolǵa qoıǵan», deıdi Janbota Jetilbekqyzy.
Aýyl mektepterin damytýdaǵy tirek mektepterdiń mańyzy týraly Bilim berýdi turaqty damytý qory Qamqorshylyq keńesiniń tóraıymy Kúlásh Shámshıdınova da erekshe atap ótti:
«Bul jobanyń eki negizgi maqsaty bar. Birinshisi – zamanaýı standarttarǵa saı sapaly bilim berý, al ekinshisi – oqýshylarda bolashaqta qajet bolatyn daǵdylardy qalyptastyrý. Tirek mektepter tek jaqsartylǵan ınfraqurylymnyń arqasynda ǵana emes, adamı kapıtaldy damytý baǵytyndaǵy júıeli jumystyń nátıjesinde de damý ortalyǵyna aınalyp otyr. Olar óz aınalasyndaǵy basqa aýyl mektepterin biriktirip, tájirıbe almasýǵa, muǵalimderdiń kásibı deńgeıin kóterýge yqpal etedi», dedi ol.
NIS komandasy aýyldyq tirek mektepterdiń 500-ge jýyq dırektory men pán muǵalimderine arnalǵan mazmundy baǵdarlama ázirledi. Aldaǵy eki kún ishinde qatysýshylar sheberlik sabaqtary arqyly ózderiniń ıdeıalary men tájirıbelerin ortaǵa salady. Jıyn barysynda muǵalimder birneshe mańyzdy baǵyttardy talqylaıdy. Atap aıtqanda, fýnksıonaldyq jáne oqý saýattylyǵyn damytýǵa arnalǵan tıimdi strategııalar, mátindi tereń taldaýǵa negizdelgen shaǵyn jobalardyń mańyzy, STEM-tehnologııalaryn pándik oqytýǵa engizý tásilderi, sondaı-aq ómirlik jaǵdaıattarǵa beıimdelgen tapsyrmalardy qurastyrý joldary sóz bolady.
Aıta keteıik, «Aýyldyq jerlerdegi tirek mektepterdiń áleýetin arttyrý» jobasynda «Nazarbaev Zııatkerlik mektepteriniń» negizgi róli – pedagogterge ádistemelik qoldaý kórsetý. Bul baǵyt aıasynda muǵalimderdiń kásibı qajettilikterin anyqtaý, sabaqtarǵa qatysyp, baqylaý júrgizý jáne keri baılanys berý, oqytý kýrstaryn uıymdastyryp, ótkizý, oqytý aıaqtalǵannan keıin de ádistemelik qoldaý bildirý, oqýshylardyń ál-aýqatyna baılanysty máselelerdi birlese sheshý, sondaı-aq muǵalimderdiń Zııatkerlik mektepter bazasynda taǵylymdamadan ótýine múmkindik jasaý sekildi mańyzdy mindetter kózdelgen.
Jobanyń aýyl mektepterin damytýdaǵy oń áserin kórsetetin jarqyn mysaldardyń biri – Ulytaý oblysy, Ulytaý aýdanyndaǵy №1 tirek mektebi. Oqý ordasynyń muǵalimderi túrli bilim berý baıqaýlaryna belsene qatysyp, joǵary nátıjelerge qol jetkizip júr. Sondaı-aq óz tájirıbelerin respýblıkalyq deńgeıde bólisip otyr.
Informatıka páni muǵalimi Marjan Ahanova qazirgi tańda muǵalim úshin kásibı damýdyń múmkindikteri sheksiz ekenin aıtady. Onyń pikirinshe, qazirgi zamanǵy mektepter tek bilim berip qana qoımaı, oqýshy men ustazǵa shabyt beredi.
«Shákirtterimiz respýblıkalyq jáne halyqaralyq baıqaýlarda jeńiske jetip, bilim granttaryn ıelenip júr. Sońǵy úsh jyl qatarynan mektebimiz oblysta «Úzdik olımpıadalyq komanda» ataǵyn alyp júr. Al meniń «Qazaqstan ustazy» ulttyq syılyǵynyń 50 fınalısi qataryna enýim – osy jobanyń arqasynda týǵan múmkindikterdiń nátıjesi», dep atap ótti Marjan Ahanova.
Eske sala keteıik, respýblıkalyq ıntensıv «Aýyldyq jerlerdegi tirek mektepterdiń áleýetin arttyrý» jobasy aıasynda ótip jatyr. Bul qaıyrymdylyq bastama Oqý-aǵartý mınıstrliginiń qoldaýymen «Nazarbaev Zııatkerlik mektepteri» derbes bilim berý uıymy, Bilim berý salasyn turaqty damytý qory jáne «Qazaqstan halqyna» qoǵamdyq qorynyń seriktestigimen júzege asyp otyr.
