Sýret: azh.kz
Munaıly shaharǵa jaqyn ornalasqan «Rechnık», «Rybnık», «Hımık», «Gıdrotehnık» baý-baqsha qoǵamdastyǵyndaǵy saıajaılardyń turǵyndary baspanasyn jeke turǵyn úı sektoryna aýystyrýdy surap júr. Turǵyndardyń shaǵymy saıajaılar aýmaǵynda jol salynbaǵanyna, elektr energııasynyń qymbattyǵyna baılanysty týyndaǵan. Saıajaılardy mekendegen turǵyndardyń osyndaı túıtkilge baılanysty janaıqaıy oblys asyp, Premer-mınıstrdiń birinshi orynbasary Roman Sklıarǵa jetti.
«Rybnık» baý-baqsha qoǵamdastyǵynyń turǵyny Qaıyrjan Orazǵalıevtiń aıtýynsha, jergilikti atqarýshy organ ókilderi máseleni sheshýge qulyq tanytpaı otyr. Joldyń joqtyǵy ábden sharshatqan. «Jergilikti ákimdiktiń máseleni sheship beremiz degenine biraz jyl ótti. Turǵyn úılerinińiz jeke sektorǵa aýystyrylady degen ýádesi de oryndalmaı keledi», deıdi Q.Orazǵalıev.
Sálıma Izgıevanyń aıtýyna qaraǵanda, kúıeýiniń birinshi sanattaǵy múgedektigi bar. Emhanaǵa aparýǵa shaqyrtqan ınvataksı úıine deıin kelmeıdi. «О́ıtkeni kóshemizdegi jol kóliktiń júrýine jaramaıdy. Sol sebepten ınvataksı de, jedel járdem kóligi de kóshemizge óte almaıdy. Kúıeýimdi trassaǵa deıin arbasymen ózim ıterip baramyn, úı mańynda serýendete de almaımyn. Jańbyr jaýǵan kezde batpaqpen júrý tipten qıyn», deıdi S.Izgıeva.
Saıajaıda jaıaý júrginshilerge arnalǵan jol joq. Sondyqtan turǵyndardyń bári kólik jolymen júredi. Ata-analar balalarynyń qaýipsizdigine alańdaıdy. «Biz qalada jóndelgen joldan alynǵan asfalttyń qaldyǵyn kóshege tóseýge usynys aıtyp edik. Alaıda oǵan ruqsat berilmeı keledi. Saıajaı turǵyndary ony óz qarjysyna satyp alady», deıdi Q.Orazǵalıev.
Atyraý oblystyq jolaýshylar kóligi jáne avtomobıl joldary basqarmasy basshysynyń orynbasary Erjan Haınollaev mundaı derektiń baryn joqqa shyǵarmady. Tipti sheneýnikter turǵyndardyń eski asfalttyń qaldyǵyn satyp alatynynan habardar bolyp shyqty.
«Eski asfalttyń qaldyǵyn jeke ıeliginde júk kóligi bar adamdar tasymaldaıdy. Biraq olardy udaıy baqylaý múmkin emes. О́tken jyly turǵyndardyń osyndaı derekke baılanysty shaǵymy tekserildi. Frezany satqan kólik júrgizýshisi jumystan shyǵaryldy. Al frezany barlyq saıajaıdaǵy kóshege tóseý múmkindigi joq. Turǵyndar mańyzdy kóshelerdiń tizimin jasap berse, soǵan asfalt qaldyǵyn tóseýge bolady», deıdi E.Haınollaev.
«Atyraý-Jaryq» AQ prezıdentiniń orynbasary Turlan Doshatovtyń pikirinshe, baý-baqsha qoǵamdastyǵyna elektr energııasy tehnıkalyq shartqa sáıkes berilip otyr. Alaıda ár turǵynmen jeke kelisimshart jasalmaǵan.
«Munda turǵyn úıler jeke sektorǵa jatqyzylmaǵan. Sol sebepten kelisimshart qoǵamdastyqtyń tóraǵasymen ǵana jasalady. Turǵyndar tutynǵan elektr energııasynyń kórsetkishi ortaq transformatordan alynady», deıdi T.Doshatov.
Atyraý qalasy ákiminiń orynbasary Meıirjan Muqasovtyń málimetinshe, «Qazaqstan» saıajaı jáne baý-baqsha sharýashylyqtaryn damytý jónindegi 2024–2026 jyldarǵa arnalǵan Jol kartasy aıasynda Atyraý oblysynda jumys tobynyń quramy bekitilgen, jospary jasalǵan.
«Bıyl saıajaılardaǵy transformatorlardy «Atyraý-Jaryq» AQ-nyń balansyna berý kózdelgen. Sol kezde elektr energııasymen qamtý, tarıfti retteý máselesi sheshimin tabady», deıdi qala ákiminiń orynbasary.
Onyń deregine qaraǵanda, Atyraý qalasynyń mańyndaǵy 45 baý-baqsha qoǵamdastyǵynyń alabynda 15 myńnan astam turǵyn tirkelgen. Qazir ákimdik tarapynan túgendeý jumysy júrgizilip jatyr. Sonyń qorytyndysymen málimetter taǵy jańartylady. Saıajaılardaǵy turǵyn úılerdi jeke sektor sanatyna jatqyzý úshin Atyraý qalasynyń bas josparyna ózgeris engizý qajet. Bas jospar Úkimettiń 2016 jylǵy 29 qarashadaǵy №749 qaýlysymen bekitilgen.
«Bas josparǵa ózgeris engizýge qatysty Atyraý oblystyq qurylys, sáýlet jáne qala qurylysy basqarmasymen birlesken jumystardy atqarý qolǵa alyndy. Shahardyń qaıta jasaqtalǵan bas josparyn Úkimet qaýlysymen osy jyldyń jeltoqsan aıynda bekitý josparlanyp otyr. Osy tetikter iske asyrylǵannan keıin ǵana saıajaı alqaptaryna qajetti ınjenerlik ınfraqurylymnyń bárin tartý múmkindigi qaralady. Atyraý qalalyq sáýlet, qurylys jáne jer qatynastary bólimi qolǵa alǵan túgendeý jónindegi jumysty jedeldetýge tapsyrma berildi. Infraqurylym salýǵa qajet jobalyq-smetalyq qujattamany jedel bastaý, qala joldaryna qurylys-montaj jumystaryn jasaqtaý kezindegi bosaǵan frezany tapsyrysqa sáıkes bólý josparlanady», deıdi M.Muqasov.
Atyraý oblysy
