Jańaqorǵanda makaron shyǵady

Jýyrda aýdan ákimi Májıt Sámıtov «Rýhanııat» ortalyǵynda jergilikti ónimder kórmesimen tanysyp, kásipkerlermen kezdesti. Kezdesýde aýdandaǵy shaǵyn jáne orta kásipti damytý, jergilikti ónimdi kóbeıtý máse­leleri talqylandy. Aýdan ortalyǵyndaǵy kór­mege ónimin jetkizgen kásipkerdiń biri – Erkinbaı Shiderbaev. Olardyń otbasylyq bıznesi 2000 jyldary bastalypty. Bastapqyda dúken ashyp, taýar saýdalady. Keıin naýbaıhanany iske qosyp, nan pisiripti. «On­shaqty jyldan keıin bul salada básekeles kóbeı­di. Un baǵasy da jyl saıyn qymbattap, ónimdi azaı­týǵa týra keldi», deıdi kásipker.

Osydan keıin ol naryqtaǵy ótimdi taýardyń biri – makaron ónimderin zertteı bastaıdy. Bazar sóresin toltyryp turǵan osy ónimniń neshe túriniń ózge elden ımporttalyp keletinine nazar aýdarady. Joba daıyn­dap, memlekettik qoldaý nátıjesinde, 19,5 mln teńgege qol jetkizgende eń aldymen qondyrǵy izdeýge kiristi. Tapqan ıtalııalyq qondyrǵy saǵatyna 160-200 kılo ónim shyǵarady eken.

«Alǵashqy ónimdi shyǵaryp, sórege qoıǵanǵa deıin biraz qarjy jumsadyq. Osylaısha, «Baybol» makarony aqpan aıynyń alǵashqy onkúndiginen bastap, aýdan naryǵyna jol tartty. Aı ishinde 2 tonnadan astam ónim shyǵardyq. Makaron sapasy óte joǵary, quramyna eshqandaı boıaǵysh qosylmaǵan. Ázirge aýdandaǵy saýda úıleri men dúkenderge ótkizip jatyrmyz. Eger suranys artyp, tapsyrys kóbeıse kórshi óńirlerge de jetkizýge daıynbyz», deıdi kásipker.

Qazir tapsyrys bergen qaptamanyń kelýin kútip otyr. Jaqyn kúnderi saýda núktelerine «Baybol» bar­lyq málimeti jazylǵan jańa oramamen túse bas­taıdy. Kásip­ker buryn mundaı óndiris túrimen aınalysyp kór­megendikten ónim keptirgish jaǵy azdaý bolyp tur­ǵanyn aıtady. Ony kóbeıtkesin seh óz qýatyna tolyq kóshedi.

Ázirshe sehta 3 adam jumys istep jatyr. Bıznes-josparda kórsetilgendeı, keptirgish alǵan soń jumys­shy­lardy 6 adamǵa deıin kóbeıtedi. Qazir makaronnyń rakýshka, rojkı, vermıshel sekildi túrleri shyǵarylyp jatyr. Bastysy – baǵasy syrttan keletin ónimnen arzan. Tapsyrys kólemine qaraı munda kespe, jaıma túrlerin de shyǵarýǵa bolady.

Qyzylorda oblysy,

Jańaqorǵan aýdany