BUU shtab-páterinde Iаdrolyq qarýǵa tyıym salý týraly shartqa qatysýshy memleketterdiń konferensııasyna Qaraǵandy oblysynyń delegasııasy da qatysty.
О́ńirden barǵan delegasııa ókilderi Semeı ıadrolyq polıgonynyń qurbany, álemge áıgili sýretshi Káripbek Kúıikovtiń sýretteri men oblystyq tarıhı-ólketaný mýzeıiniń qorynan «Polıgon jańǵyryǵy» atty fotokórmemen tanystyrdy.
«Bizdiń otanymyzdyń ónerin BUU sııaqty mańyzdy halyqaralyq tuǵyrnamada tanystyrý – biz úshin úlken mártebe. Biz shyǵarmashylyq pen óner arqyly beıbitshilik pen turaqtylyqtyń mańyzdylyǵy týraly, jahandyq qaýipsizdikti qoldaýdaǵy árbir adamnyń rólin jetkize alatynymyz anyq», deıdi oblystyq mádenıet, arhıvter jáne qujattama basqarmasynyń basshysy Erkebulan Jumakenov.
Iаdrolyq qarýdy taratpaý jónindegi konferensııa – úkimetterdi, ǵalymdardy, belsendiler men azamattyq qoǵam ókilderin qosa alǵanda, álemniń túpkir-túpkirinen delegattardy jınaıtyn álemdik arenadaǵy mańyzdy oqıǵa.
Oblys uıymdastyrǵan kórme qatysýshylardyń nazaryn beıbitshilikti saqtaý jónindegi jahandyq kúsh-jigerdiń mańyzdylyǵyna aýdardy.
Aımaq delegasııasynyń osy mańyzdy forýmǵa qatysýy Qazaqstannyń álemdik qoǵamdastyqpen mádenı jáne dıplomatııalyq baılanystaryn tereńdetýge yqpal etkenin maqtan tutady. Kárikbek Kúıikov kórmesi, sondaı-aq murajaı qoryndaǵy fotokórme konferensııa boıy jumys istedi.
Kórmege kún saıyn 100-den astam adam kelip, olardyń árqaısysy Káripbek Kúıikovtiń ónerine, Qazaqstannyń ıadrolyq qarýdy taratpaý qozǵalysyna qosqan erekshe úlesine tánti boldy.
«Semeı polıgony – KSRO-nyń ıadrolyq synaq polıgondarynyń biri, asa mańyzdy strategııalyq nysanasy boldy. KSRO ıadrolyq synaq júrgizýge Qazaqstandy tańdady. О́ıtkeni dalalyq jeri kóp, halyq sany az. Qazaqstanda 1949 jyly alǵash ret synaq bastaldy. Semeı polıgony jabylǵanǵa deıin qazaq dalasynda qanshama jarylys jasaldy. Ata-anam sol synaqtardy óz kózimen kórgen. Kartınalarymda sol ıadrolyq jarylys sátin, synaqtyń zardaby tıgen qazaq shańyraǵyn beıneledim», deıdi sýretshi.
Káripbek óziniń óneriniń arqasynda álemdegi beıbitshilik pen ıadrolyq qarýmen kúrestiń sımvolyna aınalǵan jan. Qylqalamnyń qudiretimen óz kartınalarynda adamzattyń qasiretin jetkizdi. Sonysyn álem moıyndady. Káripbek Kúıikov Nobel syılyǵynyń nomınanty boldy. Álemniń birneshe elinde Káripbek Teltaıulynyń kartınalary kórmege qoıyldy. Sondaı-aq, ol «Nevada-Semeı» halyqaralyq antııadrolyq qozǵalysynyń belsendisi bolyp, Semeı ıadrolyq polıgonynyń jabylýyna zor úles qosty. Onyń ár týyndysynda kúres, úmit, beıbit, ómirge umtylý bar.
«Onyń shyǵarmalaryn tanystyra otyryp, biz elimizdiń búkil álemdegi beıbitshilik pen turaqtylyqty qoldaıtynyn kórsettik. Bizdiń basty maqsatymyz – bolashaq urpaq úshin qaýipsiz, gúldengen álemdi qaldyrý!», deıdi delegasııa quramyndaǵylar.
Qaraǵandy oblysy
