Zamanaýı tehnologııalarmen jabdyqtalǵan óndiris orny ónimniń beriktigi men ekologııalyq tazalyǵyn qamtamasyz etedi. Jáshikter halyqaralyq standartqa saı quıylyp, barlyq tasymaldaý jáne saqtaý talaptary qatań saqtalady. Qazirgi óndiristik qýaty aýdannyń jáshikke degen qajettiliginiń 50 paıyzyn óteıdi. Kásiporyn aldaǵy ýaqytta óndiris kólemin 2 ese arttyrýdy josparlap otyr. Jańa qurylǵylar ornatylyp, jyldyq ónim kólemin 1,2 mln danaǵa deıin ulǵaıtý kózdelgen. Joba óńirdiń ónerkásiptik áleýetin arttyryp qana qoımaı, jergilikti turǵyndardy jumyspen qamtýǵa, plastık qaldyqtaryn tıimdi paıdalanýǵa múmkindik bermek.
Uıǵyr aýdanynyń ákimi Bota Eleýsizova jańa óndiristiń ashylýy óńir ekonomıkasyn damytýǵa zor úles qosatynyn atap ótti.
«Bul kásiporyn – aýdanymyz úshin mańyzdy bastama. Birinshiden, jańa jumys oryndary ashylyp, jergilikti turǵyndar turaqty jumyspen qamtyldy. Ekinshiden, óńirimizdegi ónerkásip salasy damyp, plastık qaldyqtaryn qaıta óńdeý arqyly ekologııaǵa da oń áser etemiz. Bolashaqta osyndaı óndirister sany arta beredi dep senemiz», dedi aýdan ákimi.
Jańa óndiris ornynyń iske qosylýy Qaradala óńiriniń ónerkásiptik áleýetin arttyrýmen qatar, jas kásipkerlerge úlgi de bolary anyq.
«Topyraǵy qunarly aýdanymyzda jemis-jıdektiń, ásirese sary óriktiń san túri tógilip jemis beredi. О́zimniń de órik ósetin aýqymdy baǵym bar. Naýqan kezinde jańa pisken jemisti jınap, ótkizýge kerek jáshikterdi kórshiles Reseı, Qytaı, Qyrǵyzstannan satyp alyp júrdik. Sol sebepti, osy óndiristi zertteı kele, aýdanymyzdan qarapaıym jáshik óndiretin seh ashýǵa bel býdyq. Kúzgi jıyn-terin ýaqytynda sapaly ári ekologııalyq taza ónimge suranys eselep artady. Endi syrttan tasyp áýre bolmaı, jıyn-terimge kerek jáshikti ózimizde óndirip, qajettilikti óteýge kúsh jumyldyramyz», deıdi «Attıla-ál Farabı» JShS jemister men kókónisterge arnalǵan plastıkalyq jáshikter óndirý sehynyń basshysy Álimjan Áshimov.
Almaty oblysy
