Ol bala kezinen tehnıkaǵa qumar bolyp ósti. 1981 jyly qazirgi Taraz (burynǵy Jambyl) qalasyndaǵy №56 kásiptik-tehnıkalyq ýchılıshege oqýǵa tústi. Sol kezde bar bolǵany 14 jasta edi.
«Ýchılısheni 1984 jyly kran mashınısi mamandyǵymen bitirdim. Oqý ornynan joldamamen Taraz qalasyndaǵy sılıkat zaýytyna jumysqa jiberdi. Atyraýlyq Marat degen jigit sol jyly kúzde Tarazdaǵy áskerı bólimge boryshyn óteýge shaqyrylǵan eken. Qurylys salasyndaǵy áskerı bólim bolǵandyqtan, soldattar bizdiń zaýytta jumys istedi. Biz sol kezde tanystyq», deıdi B.Sanqybaeva.
Tarazdaǵy áskerı bólimdi 1986 jylǵy kóktemde Atyraýǵa kóshiripti. Sol kezde Marat qyzylordalyq boıjetkenge otbasyn qurýǵa usynys bildirgen. Biraq ózi áskerı boryshyn ótep júrgendikten, bolashaq kelinin anasy alyp ketken.
«Marat Atyraýǵa áskerı bólimmen birge keldi. Úıge asyǵyp turatyn edi. Ofıserler «Úıińe jıi barasyń» dep, ony Aqtóbe oblysynyń Hromtaý qalasyna aýystyryp jiberdi. Sodan úıge qarasha aıynda keldi. Marat ekeýmiz 2 ul, 1 qyz tárbıelep ósirdik. О́kinishke qaraı, kúıeýim ómirden ótip ketti», deıdi ol.
Oǵan alǵashynda munaıly shahardaǵy balshyq batpaq pen masaǵa úırený ońaı bolmapty. Sol kezde kúıeýiniń: «Qınalyp júrgenińdi bilemin. Sál shydasań, úırenip ketesiń. Balalarymyzdyń qyzyǵyn birge kóremiz», degen sózi jiger beripti.
«Qazir kúıeýimniń ómirde joqtyǵy ózegimdi órteıdi. Degenmen uldar erjetti, qyz boıjetti. Úlken ulym kólik júrgizýshisi, qyzym lokomotıv deposynda bas esepshi bolyp jumys isteıdi. Kishi ulym teplovoz mashınısiniń kómekshisi, jaqynda bilimin jetildirýge attandy», deıdi Bahytgúl Qýanyshbaıqyzy.
Onyń aıtýynsha, kran mashınısi mamandyǵymmen jumys istegenine 41 jyl bolypty. Bul – az ýaqyt emes. Jumys babyna oraı birneshe mekemege aýysqan. Biraq mamandyǵyna adaldyqtan taımaı, ózge kásipti tańdamaǵan. Atyraýǵa kelgen soń, 1996 jylǵa deıin «Tastemir» AQ-da 10 jyl jumys istedi. Odan keıingi tórt jylyn Atyraý temirjol stansasyndaǵy vagon deposyna arnady. 2003–2010 jyldary «Qazkomservıs» JShS-da de kran mashınısi retinde jumysyn odan ári jalǵastyrdy. Keıingi 15 jyldan beri «Aqjaıyq-7» JShS-da jumys istep keledi.
«Ár mamandyqtyń ózindik ereksheligi bar. Kran mashınısine qyraǵylyq pen dáldik qajet. О́ıtkeni bıikke kótergen júkti eshteńege uryndyrmaı, kózdelgen jerge dál qoıý kerek. Jalpy, tájirıbe jınaǵan mamanǵa jumys isteýdiń túk qıyndyǵy joq. Bıyl jumysshy mamandyǵyna erekshe kóńil bólinip jatyr. Prezıdenttiń qolynan marapat alýdyń, Aqordaǵa kirýdiń áseri bólek eken. Bul tosynsyı boldy. Memlekettiń qarapaıym jumysshylarǵa qoldaý kórsetetinin sezindim», dedi ol.
Atyraý oblysy
