Foto: Ashyq derekkóz
Atyraý oblystyq tabıǵı resýrstar jáne tabıǵat paıdalanýdy retteý basqarmasy basshysynyń orynbasary Nurgúl Qalıevanyń aıtýynsha, «Instıtýt Kazgıprovodhoz» JShS-men kelisim jasalǵan. Sý qoımasyn Jylyoı aýdanynyń ortalyǵy – Qulsary qalasynan 60 shaqyrym qashyqtyqta salý josparlanyp otyr.
Osyǵan baılanysty sý qoımasynyń tehnıkalyq-ekonomıkalyq negizdemesi alǵash ret talqylandy. Sý qoımasynyń tehnıkalyq-ekonomıkalyq negizdemesiniń úsh nusqasy bar. Talqylaýdan keıin 220 mln tekshe metr sý jınalatyn nusqasy tańdaldy.
«Jylyoı aýdanynda sý qoımasyn salý – keńes odaǵy kezinde de kóterildi. Endi bul másele qaıta qozǵaldy. Jobanyń tıimdiligi eskeriledi. Sý qoımasy Qulsary qalasy men eldi mekenderdi, mal jáne egin sharýashylyǵymen aınalysatyn sharýa qojalyqtaryn sýmen qamtıdy. Aldaǵy ýaqytta naqty usynystar boıynsha tehnıkalyq-ekonomıkalyq negizdemege sáıkes jobalyq-smetalyq qujaty jasaqtalady», deıdi Nurgúl Qalıeva.
Onyń pikirinshe, sý qoımasy birneshe máseleni oń sheshýge yqpal etedi. Birinshiden, Jylyoı aýdanynyń eldi mekenderin sý tasqynynan qorǵaıdy. Ekinshiden, aýdannyń ekologııalyq ahýalyn jaqsartady. Úshinshiden, ekonomıkalyq turaqtylyqty qamtamasyz etetin mańyzdy ınfraqurylymdyq nysanǵa aınalady.
Biraq sý qoımasynyń qurylysyna qajetti qarjynyń qaıdan bólinetini naqtylanǵan joq. Jobany iske asyrý merzimi aıtylmady.
