Soltústik Qazaqstan eginshileri byltyrǵy astyqty jınaýda

PETROPAVL. 5 mamyr. Byltyr kúzdiń  jaýyn-shashyndy bolýy saldarynan Qyzyljar óńirinde de  mańdaı termen ósirgen astyǵyn  jınaı almaı, qar astynda qaldyrǵan sharýashylyqtar az emes. Kúnniń jylynyp, jer degdisimen olar «qyr kemelerin» egin tanaptaryna shyǵaryp, qyzý  eńbek  kórigin qyzdyryp sala berdi. Bul týraly KTK telearnasy habarlady. «Kóktemde astyq orý  óńimiz túgil túsimizge enbegen jaıt. Tabıǵat óktemdigine qarsy turar kúsh joq.  Mamandardyń aıtýynsha,  ótken jyly astyq jınaýǵa 12 kún ǵana qolaıly bolypty. Tym bolmasa,  shyǵyndy aqtamasa da, jemazyqqa jarap qalar degen úmitimiz bar.  Joqtan jaqsy ǵoı», deıdi tájirıbeli kombaınshy Vladımır Dolganov. Agroqurylym basshylary  kóktemde astyq orý  oqıǵasynyń osydan jarty ǵasyr buryn oryn alǵanyn eske alady. Keıbir sharýa qojalyqtary  egindi destege túsirgenimen, bastyrýǵa úlgirmepti.  Mundaıda ónimdilik týraly sóz qozǵaýdyń ózi artyq.  Mehanızator Vladımır Ostapınniń málimdeýinshe, astyq ysyraby kóp. Maldyń tuıaǵyna taptalǵan.  Dala kemirgishteri zııan keltirgen. Gektar shyǵymdylyǵy  eki sentnerge ǵana jeteǵabyl. Jınalǵan astyq barynsha tazartylyp,qus fabrıkalary men mal sharýashylyǵymen aınalysatyn  seriktestikterge jóneltilýde.  Al, áli pisip-jetilmegen maıly daqyldardy jınaý tehnologııasy  tipti kúrdeli. Soǵan qaramastan astyq úshin jantalasqan dıqandar el rızyǵyn jınap alýdyń barlyq  joldaryn qarastyrýda. Sheneýnikter alqaptardyń  nebári úsh paıyzy ǵana orylmaı qaldy dep esep bergen  bolatyn.  Qyr ústindegi qarbalas qımylǵa qarasaq, sóz ben is úılespeıtin syqyldy. О́mir Esqalı. Derek: KTK telearnasy. Sýret: egemen.kz