Foto: ashyq derekkóz
«Kóshede ilinip turǵan valıýta baǵamy týraly aqparat – áleýmettik mańyzy bar aqparat. Ol árdaıym qoljetimdi ári barynsha ashyq bolýy kerek. «Jarnama týraly» zań valıýta baǵamdaryn aıyrbastaý pýnktteriniń qasbetterine, shatyrlaryna jáne kireberisterine ornalastyrýǵa tyıym salmaıdy», deıdi Aıyrbastaý pýnktteri qaýymdastyǵynyń ekonomıkalyq suraqtar boıynsha keńesshisi Rábııam Serikbaeva.
Aıyrbastaý pýnkt ıeleri Ulttyq banktiń mundaı ereje qabyldaýynyń ózi «ádiletti emes» dep sanaıdy. Olardyń paıymynsha, jańa ereje jobasy «Aqparatqa qol jetkizý» týraly zańǵa qaıshy keledi. Ári Ulttyq banktiń kóshe keńistigin, jol qaýipsizdigin jáne qalalardyń sáýlettik kelbetin retteýge ókilettigi joq degen pikirdi aıtady.
Ulttyq bank usynǵan málimetke súıensek, qazir elimizde 565 aıyrbastaý pýnkti bar. Eger jańa ereje kúshine ense, olardyń tabysyna, tutynýshylar sanyna mindetti túrde áser etedi.
Sala mamandarynyń sózinshe, saýda ortalyqtary, áýejaılary, temir jol men kazınolarda ornalasqan aıyrbastaý pýnktteri taqtany alyp tastaýǵa mindetti emes. Qaýlyda ondaı ereje joq. Shekteý tek kóshe boıyndaǵy aıyrbastaý pýnktterine qatysty.
Aıta keteıik, valıýta kýrsy jazylǵan tablony alyp tastaý týraly qaýly «Ashyq NQA» portalynda jarııalandy. Ázirge kúshine engen joq, talqylaý 14 sáýirge deıin sozylady. Eger kúshine ense, pýnkt ıeleri ol taqtany ǵımarat ishine ǵana ilýge mindetti bolady.
Aıyrbastaý pýnktteriniń jumysyna qatysty ereje bul ǵana emes. Qańtarda Ulttyq bank aıyrbastaý pýnktterindegi sheteldik valıýtalardy satyp alý jáne satý baǵamdarynyń arasyndaǵy aıyrmashylyqty belgiledi. Endi aıyrbastaý pýnktterinde dollardy satý men satyp alý kezindegi aıyrmashylyq 7 teńgeden aspaý kerek. Al eýrony satý men satyp alý kezindegi aıyrmashylyq 10 teńgeden aspaýy tıis.
