Elbasy Eýropalyq komıssııanyń burynǵy tóraǵasyn qabyldady

ASTANA. 5 mamyr. Elbasy Eýropalyq komıssııanyń burynǵy tóraǵasy Joze Manýel Barrozýdy qabyldady. Bul týraly akorda.kz habarlady. Memleket basshysy Qazaqstan men Eýropalyq Odaq arasyndaǵy ózara qarym-qatynasty nyǵaıtýǵa qosqan eleýli úlesi úshin Joze Barrozýǵa alǵys aıtty. «Eýropalyq komıssııaǵa Siz tóraǵalyq etken kezde Qazaqstan men Eýroodaq arasyndaǵy taýar aınalymy on ese artty. Sizdiń pármendi yqpalyńyz, dostyq kómegińiz arqyly biz Qazaqstan men Eýroodaqtyń keńeıtilgen seriktestigi jáne yntymaqtastyǵy týraly kelisim jobasyna qatysty kelissózder aıaqtalǵany jónindegi qujatqa qol qoıdyq. Eýropalyq Odaq bizdiń negizgi saýda seriktesimiz bolyp qala bermek», – dedi Qazaqstan Prezıdenti. Joze Barrozý óz qyzmetine joǵary baǵa bergeni úshin Nursultan Nazarbaevqa rızashylyq bildirip, Qazaqstan men Eýroodaq arasyndaǵy seriktestik budan ári óristep, onyń aıasy keńeıe beredi dep úmittenetinin jetkizdi. «Eýropalyq komıssııanyń tóraǵasy retinde men Qazaqstan men Eýroodaq arasyndaǵy tyǵyz seriktestikti qoldaý úshin qajet bolǵan bar kúsh-jigerimdi saldym jáne ózimniń oǵan qosqan úlesimdi zor maqtanysh tutamyn. Sondaı qarym-qatynas ornatý úshin Sizdiń tikeleı atsalysýyńyz da óte mańyzdy boldy», – dedi Eýropalyq komıssııanyń burynǵy tóraǵasy. Kezdesý barysynda Memleket basshysy halyqtar arasyndaǵy dostyq pen yntymaqtastyqty nyǵaıtýǵa qosqan úlesi úshin Joze Barrozýdy II dárejeli «Dostyq» ordenimen marapattady. Elaman Qońyr. Derek, sýret: akorda.kz.