Oblys ákimi forým jumysyna sáttilik tilep, elimizdiń ár óńirinen jınalǵan jastardy Qazaqstan halqy Assambleıasynyń 30 jyldyq merekesimen quttyqtady. Jastarǵa óńirde qolǵa alynǵan bastamalar týraly aıtyp ótti.
Assambleıanyń 30 jyldyǵy aıasynda Qyzylorda qalasynda Dostyq úıi boı kóterip keledi. Alda kele jatqan Qazaqstan halqynyń birligi merekesi kúni oblys ortalyǵynan Shyǵarmashylyq akademııasy ashylyp, qaıta jańǵyrtýdan ótken zamanaýı demalys parki el ıgiligine paıdalanýǵa beriledi.
Senat depýtaty Nurııa Nııazova jastar assambleıasy júzege asyryp kele jatqan jobalarǵa toqtaldy. Jastar uıymdary ókilderi elimizde volonterlikti damytýǵa da úlken úles qosyp keledi.
Forým otyrysynda Ǵylym jáne joǵary bilim mınıstrliginiń Joǵary jáne joǵary oqý ornynan keıingi bilim komıteti tóraǵasynyń orynbasary Aqerke Abylaıhan, «Assambleıa jastary» respýblıkalyq qoǵamdyq birlestiginiń tóraǵasy Tımýr Jumyrbaev jasampaz istiń basynda júretin jastarǵa sáttilik tiledi.
Respýblıkalyq forýmǵa elimizdiń ár óńirinen kelgen jastardyń qatysýymen Qorqyt ata atyndaǵy Qyzylorda ýnıversıtetiniń «Kyzylorda Hub» kovorkıng ortalyǵynda «Jasandy ıntellekt: múmkindigi men áleýeti» taqyrybynda seksııa jumysy ótti. Onyń aıasynda ýnıversıtet janynan «Stýdenttik assambleıa» ortalyǵy ashylyp, tóraǵalyǵyna óńirlik «Assambleıa jastarynyń» belsendisi Ismaıl Mahadınov taǵaıyndaldy. «Jasyl bolashaqqa – jastarmen birge!» uranymen oqý ornynyń botanıkalyq baǵynda aǵash egý aksııasy uıymdastyryldy.
Al «Bolashaq» ýnıversıtetinde ótken seksııalyq otyrys jumysshy mamandyǵynyń mańyzdylyǵyn arttyryp, jastardyń kásiptik baǵdaryn aıqyndaýǵa arnaldy. Forým qonaqtary ýnıversıtet ınfraqurylymymen, arnaıy kabınettermen, jylyjaı jumysymen tanysty.
Forým qonaqtary osydan 100 jyl buryn el ortalyǵy atanǵan qalany aralap, «Qorqyt ata» memorıaldy kesheni men «Baıqońyr» ǵarysh aılaǵyna ekskýrsııa jasady. Sapar sońynda jastar QHA-nyń 30 jyldyǵy emblemasy beınelengen týdyń ǵaryshqa ushyrylǵanyna kýá boldy.
Qyzylorda
