QYZYLORDA. 5 mamyr. Grýzııanyń Tbılısı qalasynda karate-do shotokannan ótken álem chempıonatynda qyzylordalyq Móldir Jańbyrbaı jeńiske jetti. Bul týraly oblystyq deneshynyqtyrý jáne sport basqarmasynyń baspasóz qyzmetine silteme jasaǵan egemen.kz tilshisi habarlady.
Álemniń 25 elinen 1260 sportshy qatysqan bul dúbirli dodada Móldir 16-17 jas aralyǵynda 48 kelige deıingi salmaqta synǵa túsip, álem chempıony atandy. Ol jarys barysynda úsh kezdesý ótkizip, fınalda Grýzııa eliniń sportshysyn 7:0 esebimen jeńdi. Sondaı-aq, komandalyq kýmıtede jerlesimiz birinshi oryndy ıelendi. Komanda quramynda Móldirden basqa mańǵystaýlyqtar Dınara Tórtkúlbaeva, Ryskúl Jıenbaeva jáne jambyldyq Áıgerim Tursynbekovalar baq synady.
Oblystyq joǵary sport sheberligi mektebinde Rústem Ábjámıevten tálim alatyn Móldir bıylǵy jyldyń 20-22 mamyr aralyǵynda Qaraǵandy qalasynda ótetin QR IV Spartakıadasyna qatysady.
Erjan Baıtiles.
Derek, sýret: egemen.kz.
