Iri órtterdi boldyrmaý jónindegi sharalar týraly Ekologııa jáne tabıǵı resýrstar mınıstri Erlan Nysanbaev, TJM bólimsheleriniń órt qaýpi joǵary kezeńge daıyndyǵy týraly Tótenshe jaǵdaılar mınıstri Shyńǵys Árinov, ǵaryshtyq monıtorıng jáne órtterdi boljaý júıeleri jónindegi jumys týraly – sıfrlyq damý, ınnovasııalar jáne aeroǵarysh ónerkásibi mınıstri Jaslan Mádıev baıandady.
Ekologııa jáne tabıǵı resýrstar mınıstrliginiń derekteri boıynsha elimizdiń memlekettik orman qorynyń aýdany 31 mln ga quraıdy, onyń ishinde ormanmen jabylǵan – 13,9 mln ga. Búginde elimizde orman órtterin erte anyqtaý júıelerimen qamtý 1,3 mln ga quraıdy. Jyl basynan beri jalpy aýdany 4,4 myń gektardan asatyn 25 órt tirkeldi.
Erlan Nysanbaev orman sharýashylyqtarynyń bıylǵy jyldyń órt qaýpi joǵary kezeńine daıyndyq dárejesine júrgizilgen tekserýlerdiń nátıjeleri týraly baıandady. Bıyl 10 sáýirdegi jaǵdaı boıynsha Aqtóbe, Atyraý, Shyǵys Qazaqstan, Jambyl, Batys Qazaqstan, Qostanaı, Pavlodar, Soltústik Qazaqstan jáne Túrkistan oblystarynyń orman mekemeleri, sondaı-aq «Semeı ormany» rezervaty daıyn bolmady. Oblys ákimdikterine anyqtalǵan kemshilikterdi joıýǵa jáne tehnıkany tolyq jaýyngerlik daıarlyqqa keltirýge usynystar joldandy.
Premer-mınıstr ákimdikterdiń nazaryn órtterdi sóndirý kezinde jedel den qoıý jáne ózara is-qımyl jasaý úshin memlekettik organdardyń is-qımyldarynyń jańa algorıtmin oryndaý qajettigine aýdardy.
Osy erejelerdi saqtamaýyna baılanysty Pavlodar oblysy men Abaı oblysynyń jaýapty vedomstvolaryna bıylǵy jyldyń alǵashqy órtteri kezinde ekologııa jáne tabıǵı resýrstar mınıstrligine, TJM jáne IIM-ge tıisti sharalar qabyldap, jaza qoldaný arqyly tergeý júrgizý tapsyryldy.
Oljas Bektenov Qazgıdromettiń ystyq jáne qurǵaq jaz týraly boljamyn eskere otyryp, órt qaýpi joǵary kezeńdegi barlyq qyzmetterdiń jedel jáne úılestirilgen jumysynyń mańyzdylyǵyn atap ótti. Maýsymǵa daıyndyq jumystaryn jandandyrý qajet aımaqtar ataldy.
«Tekseris kórsetkendeı, Tabıǵı órtterdiń aldyn alý jáne joıý jónindegi is-sharalar jospary barlyq óńirde birdeı tıisti deńgeıde iske asyrylyp otyrǵan joq. Jambyl, Qostanaı, Túrkistan, Aqtóbe, Qaraǵandy, Abaı, Jetisý jáne Ulytaý oblystaryndaǵy eldi mekenderdiń aınalasynan mıneraldy beldeý jasaý jumystary bastalmaǵan. Dalaly jerlerde, ormanda órt shyǵatyn bolsa, bul aýyldarǵa tikeleı qaýip tónedi. Batys Qazaqstan, Qostanaı, Qaraǵandy, Ulytaý oblystarynda eldi mekenderdiń aýmaǵyn qýraǵan shópter men qoqystardan tazartý jumystary áli kúnge deıin júrgizilmegen. Odan bólek, Aqtóbe, Pavlodar, Qyzylorda, Atyraý, Batys Qazaqstan, Qostanaı, Túrkistan, Soltústik Qazaqstan jáne Jambyl oblystarynyń orman mekemeleri órt qaýpi joǵary kezeńge daıyn emes. Osyǵan baılanysty óńir ákimderine bıylǵy maýsymǵa daıyndyq jumystaryn kúsheıtýdi jáne bul máseleni tikeleı baqylaýǵa alýdy tapsyramyn», dep atap ótti Oljas Bektenov.
Otyrys qorytyndysy boıynsha Premer-mınıstr birqatar mindetter júktedi. Tótenshe jaǵdaılar mınıstrligine Ekologııa jáne tabıǵı resýrstar mınıstrligimen jáne basqa da múddeli memlekettik organdarmen birlesip, mamyr aıynyń sońyna deıin tabıǵı órtke qarsy respýblıkalyq komandalyq-shtabtyq oqý-jattyǵýlaryn ótkizýdi tapsyrdy.
«Oqý-jattyǵýlarda transshekaralyq órtti sóndirý jáne kórshi memleketterdiń qyzmetterimen ózara is-qımyl máselelerin pysyqtaý kerek. О́rt qaýpi joǵary óńirlerde memlekettik avıasııanyń órt sóndirýge arnalǵan tikushaqtarynyń kezekshiligin uıymdastyrý máselesin qarańyzdar. Orman alqaptary men ashyq jerlerdi sholyp shyǵý úshin ushqyshsyz ushý apparattaryn paıdalaný kerek», — dedi Oljas Bektenov.
Ekologııa mınıstrligi ákimdiktermen birlesip tabıǵat qorǵaý jáne orman sharýashylyǵy mekemelerin ári qaraı jaraqtandyrý jónindegi jumysty jalǵastyrady. Sondaı-aq Sıfrlyq damý, ınnovasııalar jáne aeroǵarysh ónerkásibi mınıstrligimen, «Qazaqtelekom» kompanııasymen birlesip, órtti erte anyqtaý jáne órtterdiń órshý jaǵdaıyn, ony sóndirý algorıtmderin modeldeý júıeleriniń qamtý aýqymyn ulǵaıtady. Tıisti jospar-kesteni ázirleý jáne ony Úkimette bekitý, oryndalýyn qamtamasyz etý jóninde tapsyrma berildi.
Ákimdikterdiń aldyna eldi mekenderde órt sóndirý beketteri men erikti órtke qarsy quralymdardy uıymdastyrý boıynsha jumysty jalǵastyrý mindeti qoıyldy. О́ńirlerde áýe kemelerin tartý úshin janar-jaǵarmaı materıaldarynyń qajetti qorlaryn qamtamasyz etý, órt sóndirý kólikteri men tikushaqtarǵa qajetti sý kózderin daıyndaý qajettigi atap ótildi. Uıymdastyrý máselelerin bıylǵy 10 mamyrǵa deıin sheshý tapsyryldy.
Ishki ister mınıstrligi órt qaýpi joǵary kezeńde orman alqaptarynda demalýǵa tyıym salý jóninde sharalar qabyldaýy, reıdter men baqylaý júrgizý kestesin jasaýy qajet. О́rt qaýipsizdigi talaptaryn buzǵandardyń barlyǵyn jaýapkershilikke tartý mindeti qoıyldy.
Tótenshe jaǵdaılar, ekologııa jáne tabıǵı resýrstar, mádenıet jáne aqparat mınıstrlikterine, ákimdikterge el arasynda órt qaýipsizdigi talaptaryn saqtaý týraly túsindirý jumystaryn jandandyrý tapsyryldy.
