Baıqaý tehnologııalar festıvali formatynda ótti. Oǵan Qazaqstan, Qyrǵyzstan, О́zbekstan, Reseı, Fransııa jáne Birikken Arab Ámirlikteriniń 57 oqý ornynan kelgen 60-tan astam jobalyq komandalar qatysty. Qatysýshylardyń jas shamasy 7 men 22 jas aralyǵynda boldy, olar ǵaryshqa baılanysty 12 taqyryp boıynsha jasaǵan maketteri men jumys úlgilerinen bastap, ǵylymı-zertteýlik ázirlemelerge deıingi ǵylymı jobalaryn usyndy.
Kazakhstan Smart Space 2025 baıqaýy aıasynda ǵaryshty ıgerý jáne ınnovasııalyq tehnologııalardy paıdalaný ıdeıasy arqyly biriktirilgen ondaǵan jarqyn jáne alýan túrli jobalar usynyldy. Qatysýshylar spýtnıkterdiń, aıda júrý apparattarynyń jáne orbıtalyq stansııalardyń úlgilerin, Mars bazalarynyń jumys úlgilerin, energııany lazerlik tasymaldaý júıeleri men jerústilik ortada sý jınaýǵa arnalǵan qondyrǵylardyń úlgilerin kórsetti. Ásirese ekologııalyq máselelerge jáne ǵarysh qaldyqtaryn qaıta óńdeý máselelerine erekshe kóńil bólindi. Qazylar alqasy ártúrli jas sanattary boıynsha 20-ǵa jýyq komandanyń jumysyn erekshe atap ótti.
Kazakhstan Smart Space baıqaýy 2021 jyly Shýhrat Ibragımov, Marat Nurǵojın jáne Vladımır Zatolokınniń bastamasymen qurylǵan bolatyn. Osy tórt jyl ishinde ol bilim almasý jáne tehnologııalyq ınnovasııalar úshin halyqaralyq alańǵa aınaldy. Baıqaýdyń basty mindetterdiń biri – uıymdastyrýshylardyń aıtýynsha, BUU-nyń «Kún tártibi: Ǵarysh – 2030» atty strategııasynyń maqsattaryn júzege asyrý, «Halyqaralyq ǵaryshtyq jeli qoǵamdastyǵy» ınnovasııalyq baǵdarlamasyn ilgeriletý jáne TRIZATHLON jobasyn damytý.
Baıqaýǵa qatysýshylardyń jumysyna Qazaqstan ǵarysh salasynyń jetekshi sarapshylary baǵa beredi. Qazylar alqasynyń quramyna elimizdiń «Ǵaryshtyq zertteýler jáne tehnologııalardyń ulttyq ortalyǵy», «Respýblıkalyq ǵaryshtyq baılanys ortalyǵynyń», ǵylymı ınstıtýttar men tehnıkalyq zerthanalardyń ókilderi kirdi. Osy is-shara aıasynda ǵarysh salasyndaǵy jetekshi qazaqstandyq jáne sheteldik sarapshylar baıandama oqyp, sheberlik sabaqtary ótýde. Baıqaý Sátbaev ýnıversıtetiniń, «Ulttyq ǵaryshtyq zertteýler jáne tehnologııalardyń ulttyq ortalyǵy» jáne Qazaqstan jobalardy basqarý ınstıtýtynyń qoldaýymen ótkizilip jatyr.
