«Men eshqashan aıaǵymdy shalýǵa tyrysqan qaǵazbastylyq pen bıýrokratııany umyta almaımyn. Áskerı ónerkásip salasyna jaýapty mekemege óz jobamyzdy usynǵan kezde ol jerdiń adamdary maǵan bylaı degen edi: «Balam sender óte aqyldy jastarsyńdar. Jaqsy oqyǵandaryń kórinip tur. Bastamalaryń da táp-táýir. Biraq bir nárseni eskerińdershi. Sheteldikter bul salada bizden kósh ilgeri ketken. Sondyqtan olardy qýyp jetý múmkin emes», depti Seljýk Baıraqtar.
Bıýrokratııalyq kedergilerge qaramastan ol komandasymen birge Túrkııanyń qorǵanys ónerkásibine mamandanǵan Baıkar fırmasyn quryp, Baıraktar ataýymen ushqyshsyz ushaqtar oılap tapty. 2004 jyly alǵashqy jobasyna kirisken kezde kóptegen qıyndyqqa tap bolady.
Seljýk Baıraktar Túrkııadaǵy ýnıversıtettiń birinde elektromehanıka mamandyǵy boıynsha bilim alǵan. Oqý bitirgen jas maman armanyn júzege asyrmaq bolǵanda túrli ákimshilik kedergilerge ushyraıdy. Alaıda kózdegeninen qaıtpaıdy. Qaısar jigit Túrkııanyń jaýapty sala mamandaryna qolqa salyp 2005 jyly qziniń ónimin mańyzdy bir kórmege qatystyrýǵa ruqsat alady. О́nertapqysh AQSh-tyń Pensılvanııa ýnıversıtetinde qosymsha bilim alǵan eken. Magıstr dıplomynyń ıesi. 2007 jyly elge oralyp, ushqyshsyz ushaqtar jasaýǵa birjolata kirisedi. Amerıkanyń jýrnalısteri sol tusta ony «ushqyshsyz ushaq ónerkásibiniń rýhanı kósemi» dep atapty.
«Túrkııanyń ushqyshsyz joıǵysh ushaqtar ónerkásibi Seljýk Baıraktardyń esimimen tyǵyz baılanysty. Ol shyn máninde túrik halqynyń alyp kemeńgeri. Sebebi Seljýk túrkııalyq joıǵysh drondar jasap shyǵarǵan alǵashqy qurastyrýshy-ınjener. Onyń bul saladaǵy orny smartfon oılap tapqan Stıv Djobspen birdeı» dep jarysa jazdy.
Túrkııanyń maqtanyshyna aınalǵan ónertapqysh 15 jylda úlken bıikterdi baǵyndyrdy. Ushaqtardyń syzbasynan bastap maıda detaldaryna sheıin ózderi jasaı alatyn jaǵdaıǵa jetti. Baıkar kompanııasy osy kúnde Baıraktar TV-1, Baıraktar TV-2, Akınjı sekildi eń kúshti áskerı joıǵysh drondar shyǵarady. Jáne bul ushaqtar túriktiń joǵary áskerı ónerkásip tehnologııasynyń ajyramas bólshegine aınaldy.
Biz osy mysal arqyly aıtqymyz kelgeni bizge de Seljýk Baıraktardaı otandyq ónerkásipte tóńkeris jasaıtyn azamattar kerek-aq. Qudaıǵa shúkir qazaqta da ónertapqysh uldar bar. Alaıda kópshiligi shetel asyp ketken. Sol eldiń, sondaǵy korporasııanyń paıdasy úshin jumys istep jatyr. Seljýk qıyndyqtarǵa shydamaı, úlken kisilerge ókpelep, basqa elge ketip qalýyna bolar edi. Sondaı ónertapqyshty kez kelgen memleket qushaq jaıa qarsy alyp, bar jaǵdaıyn jasaıtyny shúbásiz. Biraq ol olaı ete almady. Otanyn qıyp tastap ketpedi. Kerisinshe bilimin, tájirıbesin túrik eliniń keleshegine jumsap keledi. Aldyna úlken maqsattar qoıyp sony oryndap júr. Onyń bul sheshimine Otanǵa degen súıispenshiligi, halqyna degen qurmeti men patrıottyq tárbıesi túrtki bolǵany anyq.
Bir áttegen-aıy, qazaqtyń qanshama bilimdi jasy shetelde áldekimderdiń qolastynda jumys istep júr. Solar Seljýktaı óz Otanynda ter tókse, ǵylymǵa talaı úlesin qosqan bolar edi. Sonda deımiz -aý qazirgi jastardyń boıynda Otanǵa, týǵan jerge degen mahabbattyń joqtyǵy ma?! Bilim qýyp «Bolashaqpen» oqyp kelgender ishinde Seljýktaı bir salada tóńkeris jasaǵan azamattar nege osy bizde joq?!
Bile bilsek memlekettiń baılyǵy jeriniń astyndaǵy, ústindegi qazynasy emes, onyń baılyǵy – halqy. Iаǵnı birinshi kezekte únemi adam kapıtaly turady. Sol úshin memleket jastardyń bilim alýyna, jaqsy mamandyq ıgerip shyǵýyna bar múmkindikterdi jasap jatyr. Alaıda oqyǵan aqyldy jastarymyz shetelge ketip qalýda. Sol jaqta ǵylymmen aınalysyp, jańalyqtar ashýǵa atsalysady. Árbir jas osylaı elden jyraqtaı berse, otandyq ǵylymdy kim damytady? Qazirdiń ózinde keıbir salada izimizdi basar shákirt joq dep úlken ǵalym aǵalarymyz jylap otyr.
Sol úshin qadirli jastar, kishkene patrıot bolaıyq degimiz keledi. Elden bezetindeı sonsha ne qıyndyq týdy eken. Kezinde halyqtyń qamyn jep, ólimniń ózinen taısalmaǵan Alash qaıratkerlerinen ónege alsaq ıgi. Bizdiń aıtpaq bolǵan negizgi oıymyz osy edi...
ShYMKENT
