Qostanaıda «Urpaqtar alǵysy» atty aksııa bastaldy

QOSTANAI. 5 mamyr. «Atameken» kásipkerlerdiń ulttyq palatasynyń bastamasymen  «Urpaqtar alǵysy» atty uzaq merzimdi áleýmettik jobaǵa Qostanaı da qosyldy. Bul týraly  egemen.kz tilshisi habarlady. Qazaqstannyń barlyq shalǵaıyndaǵy bıznesmender, kásipkerler Uly Otan soǵysy jáne tyl ardagerlerine kómek qolyn sozýǵa daıyn ekendigin bildirdi. Qostanaı turǵyny Nadejda Mıhaılovna Jýkova soǵys bastalǵanda 9 jasta ǵana bolatyn. Ol  anasymen birge partızandarǵa kómektesti,  olarǵa  aqparat, keıde tamaq tasydy. Osydan 70 jyl buryn ol qıyndyqty názik ıyǵymen kóterip júrip,  Jeńis týraly  armandady. Qazir  qarııa nashar estıdi, nashar kóredi. Onyń qyzy  ulttyq palatanyń  baılanys ortalyǵynan anasynyń dári-dármegine kómektesýdi suraǵan bolatyn. Dári-dármegin úıine ákelip bergen Ulttyq palata ókiline Nadejda Mıhaılovna alǵysyn aıtty. Demek, tyl ardageri Nadejda Jýkova «Atameken» ulttyq palatasy bastamasymen ómirge kelgen respýblıkalyq «Urpaqtar alǵysy» jobasynyń qatysýshysy bolyp otyr.  Mundaı kómekti alǵan tyl ardageri Nıkolaı Sıdorenko da alǵysyn aıtty. Nıkolaı Sıdorenko: «Soǵys bastalǵanda men 8 jasta  edim. Úlkender sekildi esh jumystan qalǵan joqpyn, egin de ektim, jer jyrttym, Qyzyl armııaǵa azyq-túlik daıyndadym» dedi. Qostanaı oblystyq kásipkerler palatasynyń málimetinshe, ardagerlerge kómek munymen shektelmeıdi, ol jalǵasatyn bolady. Qostanaı oblystyq kásipkerler palatasy adam kapıtalyn damytý jáne áleýmettik áriptestik bóliminiń basshysy Suńqar Sultanov: «Kásipkerler halyqtyń mundaı bóligin eshqashan nazardan tys qaldyrmaıdy. Fedorov aýdanynda kásipkerler Jeńis qoryn quryp,  ol qarjyǵa ardagerlerdiń úıin  jóndeýden ótkizdi. Oblysta  280 adam «Mılh», «IvolgaHoldıng», «Baıan Sulý» , «Qostanaı un kombınaty» sekildi iri sharýashylyqtar men kompanııalardan jyl saıyn syılyqtar alyp turady», dedi. Qostanaılyq kásipkerler  «Uly Otan soǵysynyń ardagerleri» saıtynyń úzdiksiz jumys isteýi úshin kómektesedi. Onyń úzdiksiz jumys isteýine 70 000 teńge aqy kerek boldy. Názıra Járimbetova. Derek, sýret: alau.kz