Foto: Aqorda
Prezıdenttiń aıtýynsha, oblys ortalyǵy Aqtaý qalasynyń aınalasynda ónerkásiptik kásiporyndar shoǵyrlanǵan. Olar ekologııaǵa keltirip jatqan zııandy azaıtý úshin tabıǵatty qorǵaý talaptaryn qatań saqtaýy tıis. Bul baǵytta baqylaý kúsheıtilip, zań buzýshylyqtarǵa jol berilmeýi kerek.
El Prezıdenti birneshe jyldan beri ózekti bolyp kele jatqan «Qoshqar-Ata» qaldyqtar qoımasy máselesine erekshe toqtaldy. Atalǵan aýmaqta burynǵy Kaspıı mańy taý-ken metallýrgııa kombınatyna qarasty úsh zaýyttan shyqqan 105 mıllıon tonna óndiristik qaldyq jınalǵan. Bul ekologııalyq turǵydan asa qaýipti aımaq retinde baǵalanyp otyr.
«Budan bólek, aımaqtaǵy polıgondarda 200 myń tonnadan astam qoqys jınalyp qalǵan. Ruqsat etilmegen jerge zańsyz tastalǵan qoqystar da kóp. Jalpy oblysta qoqys tastaıtyn 68 ruqsat etilmegen oryn bar. Onyń alpysy joıyldy, segizi kásipkerlerge tıesili jerde ornalasqan. Munyń bári halyqtyń turmys sapasyna keri áserin tıgizip otyr. Osy máselelerdi shuǵyl sheshý úshin Úkimet oblys ákimdigimen birge qajetti sharalardy qabyldaýǵa tıis. Bul másele boıynsha Úkimet toqsan saıyn maǵan tikeleı baıandaýy kerek», dedi Qasym-Jomart Toqaev.
Prezıdent «Taza Qazaqstan» jalpyulttyq aksııasy aıasynda eldi mekenderdi abattandyrý, kógaldandyrý jumystaryn jalǵastyrýdy tapsyrdy. Aqtaý qalasynda kóbirek aǵash otyrǵyzý qajettigin atap ótti. Ol «Taza» degen uǵymnyń halqymyzdyń bolmysyndaǵy kıeli maǵynasy bar ekenin eske salyp, bul túsinik árbir azamattyń ómir súrý mádenıetiniń bir bóligine aınalýy tıis ekenin aıtty.
Memleket basshysy ekologııa máselelerin sheshý tek Úkimet pen jergilikti atqarýshy organdardyń ǵana emes, búkil qoǵamnyń ortaq mindeti ekenin aıtyp, barlyq jaýapty taraptardy naqty áreketke kóshýge shaqyrdy.
