О́tken jyly Batys Qazaqstan óńiri alapat sý tasqynyn bastan keshirdi. Sonyń ishinde Oral qalasynyń mańynda turatyn saıajaı ıeleri qatty zardap shekti. Qaırattyń óziniń de tálimbaǵy eki aıdaı sý astynda turdy. Shaǵan ózeni jaǵasynda ornalasqan aýmaǵy 7,6 gektar bolatyn bul baqta almanyń qatań kontınentaldy klımatqa arnalǵan 200-den asa sorty, 80 túrli alma teltúbiri (podvoı), júzimniń 200-den asa erekshe túri, sondaı-aq dekoratıvti, emdik qasıeti bar terekter men butalar, qylqanjapyraqty aǵashtyń birneshe túri ósetin. Dál mundaı genofond, erekshe tálimbaq esh jerde joq edi. О́kinishke qaraı, kópjylǵy eńbektiń kóbi esh ketti, kóp terek sý astynda tunshyǵyp qaldy. Qazir Qaırat jary Rozamen birge erekshe tálimbaqty qalpyna keltirýge kúsh salyp jatyr.
– Byltyrǵy tabıǵat apatynan biz ǵana emes, kóptegen saıajaı ıeleri kópjylǵy jemis aǵashynan aıyryldy. Olardyń muń-muqtajyn bizden artyq biletin kim bar? Sondyqtan almanyń ár túrinen, bizdiń jerimizge, qatań tabıǵatymyzǵa úırengen sorttarynan 1 500-den asa túp kóshetti tegin taratýǵa sheshim qabyldadyq, – deıdi Qaırat Boranbaıuly.
Qaırattyń bul bastamasyna oraldyqtar qatty rıza boldy. Áıgili baǵbannyń qolynan alma kóshetin alýǵa alys-jaqynnan arnaıy kelgender az bolmady. Baq ıesi kelýshilerge jemis aǵashtaryn ósirý, kútip-baptaý týraly aqyl-keńesin aıamady. Osylaısha, baǵbannyń qarapaıym aksııasy qaıyrymdylyqqa tunǵan keremet is-sharaǵa aınaldy.
Batys Qazaqstan oblysy
