Bes kún boıǵy básekede elimizdiń 20 óńiriniń kolledjderinen kelgen 2 myńǵa jýyq jas basketbol, shaǵyn fýtbol, toǵyzqumalaq, shahmat, ústel tennısi jáne voleıbol syndy sport túrlerinen baq synasty. Jarys qorytyndylanǵan marapattaý rásiminde Oqý-aǵartý mınıstrliginiń tehnıkalyq jáne kásiptik bilim departamentiniń dırektory Áset Ǵarıfýllauly men Túrkistan oblysy ákiminiń orynbasary Beısenbaı Tájibaev quttyqtaý sóz sóıledi. «Memleket basshysy jarııalaǵan «Jumysshy mamandyqtar jyly» aıasynda alǵash ret uıymdastyrylǵan «Eńbek kýbogi» respýblıkalyq spartakıadasynyń Túrkistanda ótkizilýi – jastarymyzdy tek sporttyq saıysqa emes, eljandylyqqa, rýhanı tárbıe men tarıhqa taǵzym etýge bastaıtyn mańyzdy qadam», dedi Áset Ǵarıfýllauly.
Jalpy komandalyq esep nátıjesinde, Mańǵystaý oblysynyń stýdentteri úshinshi, Qaraǵandy oblysy ekinshi oryndy ıelendi. Al Almaty qalasynyń jastary jeńimpaz dep tanyldy. Sporttyń barlyq túrinen úzdik óner kórsetken almatylyq komandaǵa oblys ákiminiń orynbasary Beısenbaı Tájibaev kýbokty tabys etti. Sondaı-aq demeýshilik kórsetken birqatar kásiporyn úzdik dep tanylǵan stýdentterge aqshalaı syıaqy, jumysqa qabyldaý joldamasyn berdi.
Aıta keteıik, 2026 jyly «Eńbek kýbogi» jalǵasyn taýyp, Almaty qalasynda ótkiziledi.
