Úshinshi jyl qatarynan ótkizilgen kitap festıvaline óńirge issaparmen kelgen Prezıdent keńesshisi Málik Otarbaev arnaıy at basyn burdy. Sondaı-aq «Daryn» Memlekettik jastar syılyǵynyń laýreaty Erlan Júnis, jazýshylar Yrysbek Dábeı men Maqsat Málik bastaǵan ózge de qalamgerler is-sharanyń joǵary deńgeıde ótýine atsalysty.
Is-sharanyń ashylý saltanatynda Prezıdent keńesshisi Málik Otarbaev, oblys ákiminiń orynbasary Serik Sálemov sóz sóılep, janazyqqa aınalǵan kitaptyń negizgi rýhanı baılyq kózi ekenin atap ótti. Sondaı-aq Ulttyq kitaphana ókili Nurbala Tekesbaeva da izgi tilegin bildirdi.
«Úshinshi ret ótkizilgen festıvaldyń maqsaty aıqyn. Biz qazaq jáne shetel ádebıetin nasıhattaýǵa basymdyq berip otyrmyz. Mundaı aýqymdy is-sharalar jastardyń kitap oqýyna túrtki bolatynyna senimimiz kámil. Festıvalǵa «Alqa», «Arman PV», «Astana kitap», «Qasym», «Otbasy hrestomatııasy», «Taımas», «Atamura» sekildi iri baspalar jáne «Zııat», «Kitap al», «Býkınıst», «Sherhan Murtaza» kitap dúkenderi qatysyp, jármeńke uıymdastyryp otyr. Sol úshinde olarǵa aıtar alǵysym sheksiz», deıdi Shoqan Ýálıhanov atyndaǵy oblystyq ámbebap ǵylymı kitaphanasynyń dırektory Elmıra Abdınova.
Taǵylymy mol is-sharada birneshe jańa kitaptyń tanystyrylymy uıymdastyrylyp, túrli taqyrypta trenıngter men tanymdyq aksııalar ótkizildi. Festıval aıasynda bıyl 80 jasqa tolǵan belgili aqyn, Qazaqstannyń eńbek sińirgen qaıratkeri Qaıyrbek Asanovtyń «Mahabbat», Shapaǵat», «Parasat» atty úsh tomdyq jınaǵynyń tusaýy kesildi. О́zge de birneshe qalamgerdiń jańa jınaqtary oqyrmanǵa tanystyryldy.
TARAZ
