«Taza Qazaqstan» aksııasy – jaı uran emes, elimizdiń ózekti ekologııalyq máselelerin sheshýge baǵyttalǵan keshendi baǵdarlama. Tabıǵatty aıalaý onyń baılyǵyn bolashaq urpaq úshin saqtaýǵa múmkindik berse, taza qorshaǵan orta – halyq densaýlyǵynyń kepili. Memleket basshysynyń halyqqa Joldaýy aıasynda «Samuryq-Qazyna» AQ mańyzdy ekologııalyq bastamany júzege asyrdy. Qor ókilderi «Eko Nomad» jobasy boıynsha Almaty qalasyndaǵy «Ońtústik» saıabaǵynda tazalaý jumystaryn júrgizdi. Ekologııalyq ári áleýmettik mańyzy joǵary is-sharaǵa «Samuryq-Qazyna» AQ enshiles kompanııalarynda jumys isteıtin 200-den astam qyzmetker belsene qatysyp, 3 tonna qoqys shyǵardy.
«Samuryq-Qazyna» qory «Taza Qazaqstan» aksııasyn alǵashqylardyń biri bolyp qoldady. О́tken jyly qor kompanııalar toby 360-tan astam ekologııalyq aýqymdy is-shara uıymdastyrdy. 100 myńnan astam jasyl jelek otyrǵyzyp, 200-den astam senbilik ótkizdi. Ekologııalyq aǵartý jumystary kúsheıtilip, ondaǵan aksııa men leksııa ótti. Biz osy jylǵa da keshendi jospar quryp otyrmyz. Olardyń qatarynda, elimiz boıynsha 137 myńnan astam aǵash otyrǵyzý, 100-den astam jańa postamat ornatý, ekologııalyq mádenıetti qalyptastyrý baǵytyndaǵy aǵartýshylyq jumysty júrgizý syndy sharalar bar. Biz tabıǵatty aıalaýdy tek naýqan retinde emes, kúndelikti ómir saltyna aınaldyrýǵa shaqyramyz», dedi «Samuryq Qazyna» AQ Korporatıvtik basqarý, áleýmettik-eńbek qatynastary jáne eńbekti qorǵaý jónindegi basqarýshy dırektory Ǵıbrat Aýǵanov.
«Eko Nomad» jobasynyń maqsaty – qalalyq ınfraqurylymǵa uqypty qaraý qundylyqtaryn qalyptastyrý, halyqty azamattyq jaýapkershilik pen ekologııalyq mádenıetke tárbıeleý. Igi bastama – tabıǵatqa qamqorlyq jasap, qorshaǵan ortany jaqsartýǵa jáne ekologııalyq turaqtylyqty qalyptastyrýǵa qosqan úles qana emes, sonymen qatar óskeleń urpaqqa úlgi bolatyn is-shara.
«Búgingi ótken senbilik erekshe mańyzǵa ıe boldy. Jastar tarapynan joǵary belsendilik baıqaldy. Bul – bizdiń tabıǵatqa degen janashyrlyǵymyz ben azamattyq jaýapkershiligimizdiń aıqyn kórinisi. Osyndaı is-sharalar qorshaǵan ortany qorǵaýmen qatar urpaq tárbıesine de oń áser etedi. Biz, jastar árdaıym tabıǵatty aıalaýǵa, taza ári jaıly qala qalyptastyrýǵa daıynbyz. Aldaǵy ýaqytta da ekologııalyq bastamalarǵa belsendi atsalysamyz», deıdi «Samuryq-Qazyna» AQ Almaty qalasy boıynsha jastar qanatynyń tóraǵasy Perızat Nábı.
Tabıǵatqa qurmet – ózińe qurmet. Berekeli, jasyl bolashaq úshin birge eńbek eteıik!
Maınur JANAQOVA
