Assambleıa elimizdegi etnosaralyq tatýlyq pen kelisimniń otandyq modelin qalyptastyryp, álemge úlgi bolarlyq deńgeıge jetti. Bul – úlken mártebe. Endi osyny jetildirýimiz kerek. Ol úshin etnosaralyq qatynastarǵa erekshe nazar aýdarý qajet. Jańasha tásil zertteýlerge súıenip júrgizilýge tıis.
Qoǵam ártekti. Keıde bazbireýler birligimizge kóz alartyp qaraıdy. Eldegi tatýlyqty buzatyn, etnosaralyq qarym-qatynasqa syzat túsiretin kez kelgen áreket zań aıasynda qatal jaýapkershilikke tartylatynyn Memleket basshysy naqty aıtty. Bul sóz meni erekshe qýantty. Sebebi biz, ardagerler, kóp jyl boıy birlik pen kelisimdi saqtaý úshin qajyrly eńbek ettik. Qazir de ár kezdesý ne jıyn bolsyn, jastarǵa, jalpy qoǵamǵa «Zań men tártip» qaǵıdatyn qatal ustanýǵa úndeımin. О́ıtkeni eldegi tynyshtyqty, dostyqty saqtaý – ár azamattyń jaýapkershiligi.
Men Qazaqstan halqy Assambleıasynyń ardageri retinde bolashaqta elimizdiń birligin, tatýlyǵyn saqtaýǵa baǵyttalǵan barlyq bastamany qoldaımyn. Birliktiń arqasynda elimizdiń ekonomıkasy órleıdi, áleýmettik turaqtylyq artady. Bul – ómirden alynǵan aqıqat.
Ikram HAShIMJANOV,
«Dýstlık» ózbek etnomádenı birlestikteri qaýymdastyǵynyń tóraǵasy
