Zertteý ártúrli aýdandardaǵy bir bólmeli (35 sharshy metr), eki bólmeli (47 sharshy metr) jáne úsh bólmeli (70 sharshy metr) páterlerdi qamtıdy. Sáýirdiń aıaq sheninde elimizdiń qaıtalama naryǵyndaǵy bir bólmeli páter 13,6 mln teńgege, eki bólmeli páter 18,3 mln teńgege, al úsh bólmeli páter 27,3 mln teńgege baǵalanǵan. Bul baǵa usynysynyń ortasha kórsetkishi.
Eger eń arzan nusqalardy qarastyratyn bolsaq, onda Qyzylorda kósh bastap tur. Qalada páter baǵasy basqa óńirlerge qaraǵanda aıtarlyqtaı tómen. Atap kórsetsek, bir bólmeli páter 8,7 mln teńge, eki bólmeli páter 11,7 mln teńge, al úsh bólmeli páter 17,5 mln teńge turady. Sondaı-aq baǵa múmkindiginshe qoljetimdi qalalardyń qataryna: Taraz, Aqtóbe, Taldyqorǵan jáne Kókshetaý kiredi. Onda páter quny turǵyn úıdiń aýdany men túrine baılanysty 10,8 mln teńgeden 22,4 mln teńgege deıin aýytqıdy.
Ádettegideı Almaty – baspana jóninen eń qymbat bolyp qala beredi. Mundaǵy bir sharshy metrdiń ortasha baǵasy 751 055 teńgeni quraıdy, bul jaqyn básekeleske qaraǵanda 233 000 teńgege artyq. Sáýir aıynda ońtústik shaharda bir bólmeli páter quny 26,3 mln teńge, eki bólmeli – 35,3 mln teńge, úsh bólmeli – 53 mln teńge boldy. Almaty men Qyzylordadaǵy turǵyn úı baǵasynyń aıyrmashylyǵy úsh retten asady, ıaǵnı Almatydaǵy bir páterdiń baǵasyna Qyzylordada úsh páter satyp alýǵa bolady eken.
Astanada bir bólmeli páter 18 mln teńge, eki bólmeli – 24,3 mln teńge, úsh bólmeli – 36,2 mln teńge deńgeıinde tur. Qymbat úshtikti bir bólmeli páter úshin 15,8 mln teńgeden jáne úsh bólmeli páter úshin 31,5 mln teńgege deıingi baǵamen Shymkent túıindeıdi.
Naryqtaǵy ózgeristerge keletin bolsaq, aǵymdaǵy jyldyń sáýir aıynda Aqtaý, Aqtóbe jáne Astanada baǵalardyń sál tómendeýi baıqalady. Degenmen ótken jyldyń osy mezgilimen salystyrǵanda elde páter baǵasy orta eseppen 6%-ǵa ósken.
