1967 jyly Nartaı Bekejanov esimin ıelengen óner ujymy talaı bıikke qol jetkizdi. Bastaýynda ár aýyldan jınalǵan talanttardy toptastyrǵan óner ujymynyń shańyraq tiktegenine 70 jyl tolýyna oraı ortalyq alańda ótken halyqaralyq teatrlar festıvaliniń saltanatty ashylýynda qyzyl kilem ústimen Qazaqstannyń Eńbek Eri, Halyq ártisi Asanáli Áshimov, Halyq ártisi, Qazaqstan teatr qaıratkerleri odaǵynyń tóraǵasy Tuńǵyshbaı Jamanqulov, Grýzııa, Rýmynııa, Qyrǵyzstan men elimizdiń ár óńirinen kelgen sahnagerler júrip ótti.
Saltanatty rásimde oblys ákimi Nurlybek Nálibaev quttyqtaý sóz sóılep, mádenıet jáne rýhanııat salasynda atqarylǵan jumysqa toqtaldy.
«О́tken jyly óńirde jarııalanǵan «Rýhanııat jyly» aıasynda barlyq 7 aýdanda ishinde neke qııý zaly, kitaphana, mýzeı, arhıv, jastar saraıy, ardagerler men analar úıi bar «Rýhanııat ortalyqtary» salynyp, el ıgiligine qyzmet etip jatyr. Oblys ortalyǵynda «Shyǵarmashylyq akademııasy», «Saýts Oıl» kompanııasynyń demeýshiligimen mýzykalyq kolledjdiń jańa ǵımaraty, tarıhı-ólketaný mýzeıi boı kóterip keledi. Atalǵan nysandar jaqyn kúnderi iske qosylmaq», dedi Nurlybek Mashbekuly.
Saltanatty keshte aımaqtyń mádenıet salasyna eleýli úles qosqan sala mamandary marapattaldy. Asanáli Áshimov jyly lebizin bildirip, Tuńǵyshbaı Jamanqulov Qazaqstan teatr qaıratkerleri odaǵynyń «Dara» medalin tabys etti. Festıval qonaǵy Sábıra Maıqanovanyń kyzy Gúldár Ábdilqyzyna da syrboıylyqtar atynan qurmet kórsetildi. Qazaqstannyń eńbek sińirgen ártisi Baqytbek Alpysbaevqa «Parasat» ordeni tabystaldy
Halyqaralyq festıvalǵa Grýzııa, Rýmynııa, Qyrǵyzstan elderinen kelgen óner ujymdarymen qatar, Ulytaý, Abaı, Aqtóbe, Atyraý, Jetisý, Qostanaı jáne Alma-ty óńirleriniń teatrlary qatysty.
BAQ ókilderine arnalǵan brıfıngte Asanáli Áshimov bastaǵan qazylar alqasy men festıvaldi uıymdastyrýshylar aımaqtaǵy basty óner merekesi talantqa degen qurmettiń kórinisi ekendigin atap ótti.
«Men Qalıbek Qýanyshbaevtyń qolyna sý quıǵanymdy maqtan tutamyn. Sábıra Maıqanova apama sahnada seriktes bolyp, ónerdiń bıigin birge baǵyndyrǵanymdy taǵdyrymnyń eń úlken syıyna balaımyn. Sábıra – sahnanyń shynary edi. Onyń esimi qazaq teatr tarıhynda altyn árippen jazyldy», dedi Asanáli Áshimuly.
Festıval baǵdarlamasynda sheteldik teatr ujymdarynyń qoıylymdarymen qatar, sońǵy jyldary elimiz sahnalarynda kóringen týyndylardyń enýi otandyq dramatýrgııa men rejısserlik mekteptiń úzdiksiz damyp, jańashyl izdenisterge jol ashylǵanyn kórsetti.
«Teatr syny da qoǵam damýyna qaraı ózgeriske ushyrap otyratyny belgili ǵoı. 90-jyldardan bastap teatrlar úshin jańa shyǵarmashylyq múmkindik ashylyp, tańdaý aıasy keńeıdi. Teatr men synshylar arasyndaı baılanys úzilip qalǵan edi, qazir sol qaıta jandanyp keledi. Aldyńǵy tolqynnyń izin basqan qazirgi synshylar shoǵyry jer-jerdegi teatrlarmen baılanysty nyǵaıtty», deıdi Qazaqstan teatr synshylary birlestiginiń jetekshisi, ónertaný kandıdaty Anar Erkebaı.
Qazylar alqasy quramyndaǵy Sh.Rýstavelı atyndaǵy Grýzııa memlekettik teatr jáne kıno ýnıversıteti professory, ónertaný doktory Lasha Chhartıshvılı, I.Arabaev atyndaǵy Qyrǵyz memlekettik ýnıversıtetiniń ókili, halyqaralyq teatr synshylary birlestiginiń vıse-prezıdenti Eleonora Týrdýbekova talantyn qurmettegen eldiń bul bastamasy basqalarǵa úlgi bolsa degen tilek aıtty.
Elimizdiń ár túkpiri men shetelden kelgen 11 teatr ujymy óner kórsetetin halyqaralyq festıval shymyldyǵyn N.Bekejanov atyndaǵy akademııalyq drama teatry ónerpazdary A.Ostrovskııdiń «Naızaǵaı» dramasymen ashty.
Rejısser Dına Jumabaeva qorǵansyz názik jannyń mahabbat hıkaıasy negiz bolǵan áıgili týyndyny búgingi ómirge meılinshe jaqyndatypty. Qoıylymnyń ón boıynda kóne men jańanyń taıtalasy, qaıshylyqtar kózqarasy bar. Qamqor bolyp kóringen jannyń kóńil túkpirine jasyrǵan aıarlyǵyn, kerisinshe qatal minezdiń astaryndaǵy qaıyrymdy kórdik.
Sahna áýenindegi qaıtalanyp turatyn yrǵaqtar ómirdiń ár sátin esepke alyp turǵan saǵat tyqyly sekildi. Jıi ózgerip turatyn sahna kórinisteriniń birinde ústel ústindegi túıinshekterdi tasyǵan ár keıipker óz mańdaıyna jazylǵan peshenesin arqalap júrgendeı kórindi.
Jergilikti ónerpazdardardan keıin Elvıra Godıaný atyndaǵy rýmyn teatry qyzylordalyq kórermenge Edýardo De Fılıpponyń «Marriage and Divorce» dramasyn usyndy. Osylaısha, kórermen apta boıy festıvalǵa jıylǵan óner ujymdarynyń qoıylymyn tamashalady.
Sáýirdiń sońǵy aptasy máńgi ólmes óner ıesi Sábıra Maıqanovanyń rýhy Syr aspanynda qalqyp turǵandaı boldy...
Qyzylorda
