Kartada 82 myń neıron, 500 mıllıonnan astam sınaps (neırondar arasyndaǵy baılanys núktesi) jáne 4 shaqyrymǵa jýyq neıron symdary kórsetilgen. Bul málimetterdiń bári – tyshqan mıynyń tek 1 mm³ kólemindegi bóliginen alynǵan. Mundaı dáldik pen aýqym buǵan deıin adam mıynyń tekshe mıllımetrlik kartasynda ǵana kezdesken edi. Biraq onda nebári 16 myń neıron men 150 mıllıon sınaps bolǵan.
Zertteýshiler aldymen tyshqannyń kórý qyrtysyndaǵy 76 myńǵa jýyq neıronnyń belsendiligin tirkegen. Tyshqan eki saǵat boıy ekrannan túrli vıdeolardy, sonyń ishinde «Matrısa» fılminen úzindilerdi kórgen. Osy kezde mı jasýshalary qalaı jumys isteıtini, bir-birimen qalaı baılanysatyny jazylyp alynǵan. Keıin tyshqan mıynyń sol bóligin óte juqa myńdaǵan tilikke bólip, árqaısysyn mıkroskoppen sýretke túsirgen. Sýretterdiń bári arnaıy kompıýterlik baǵdarlama arqyly biriktirilip, 3D karta jasalǵan. Jasandy ıntellekt pen mashınalyq oqytý arqyly neırondar men olardyń tarmaqtary, sınapstary anyqtalyp, kartaǵa túsirilgen. Zertteý nátıjesinde mı neırondarynyń arasyndaǵy baılanys zańdylyqtary da anyqtaldy. Mysaly, uqsas kórinisterge jaýap beretin neırondar – birdeı baǵyttaǵy qozǵalys nemese belgili bir pishin – bir-birimen jıi baılanysady eken. Bul olardyń araqashyqtyǵyna qaramastan júzege asa beredi.
Zertteýge 150-den astam ǵalym qatysqan. Joba «Kortekstik jelilerden mashınalyq ıntellekt» (MICrONS) dep atalady. Ǵalymdar jınaǵan derekterdi barsha zertteýshilerge ashyq túrde usynyp otyr. Qazir karta tyshqan mıynyń tek 0,2%-yn ǵana qamtıdy. Degenmen, zertteý toby bolashaqta bul tehnologııany búkil mı kólemin kartaǵa túsirýge paıdalanbaq. Ǵalymdardyń aıtýynsha, zertteý mıdyń kórý, este saqtaý, aqparatty óńdeý sııaqty kúrdeli qyzmetterin tereńirek túsinýge jol ashady.
