«Jumysshy mamandyqtar jyly» aıasynda eńbek adamyna degen jan-jaqty qoldaý artyp, olardyń quqyqtary men múddelerin qorǵaýǵa basa nazar aýdarylýda. Bul bastama – eńbek adamyna degen tereń qurmettiń aıqyn belgisi ári olardyń qoǵamdaǵy mártebesin kóterýge baǵyttalǵan mańyzdy qadam.
Osy oraıda Eńbekshiqazaq aýdanynda Jastar resýrstyq ortalyǵynyń bastamasymen jáne aýdan ákimdiginiń qoldaýymen Esik qalasynda «Jumysshy mamandyqtar alleıasy» ashyldy.
Sharaǵa aýdannyń belsendi jastary, eńbek ardagerleri men qoǵam qaıratkerleri qatysty. Is-shara barysynda Esik kásiptik-tehnıkalyq kolledjiniń stýdentteri men eriktileri birigip, aǵash kóshetterin otyrǵyzyp, alleıa aýmaǵynda tazalyq jáne abattandyrý jumystaryn júrgizdi.
Bul bastama ekologııalyq mádenıetti qalyptastyrýmen qatar, jastardyń eńbekke degen qurmetin arttyryp, týǵan jerge degen súıispenshiligin nyǵaıtatyny sózsiz.
Memleket basshysy jarııalaǵan “Taza Qazaqstan” ekologııalyq baǵdarlamasynyń aıasynda ashylǵan «Jumysshy mamandyqtar alleıasy» – eńbek adamyna kórsetilgen shynaıy qurmettiń kórinisi ǵana emes, sonymen qatar jas urpaqty eńbeksúıgishtikke tárbıeleýdiń taǵylymdy úlgisi.
