Kelisimge Qazaqstan men Vetnam arasyndaǵy iskerlik dóńgelek ústel aıasynda qol qoıyldy. «Mámile jekeshelendirýdiń keshendi jospary aıasynda júzege asty. Satyp alýshy — SOVICO Group kompanııasy. Mámileniń keıinge qaldyrylǵan barlyq sharttary oryndaldy, tólem tolyq qabyldandy, al aksııalar ınvestordyń esepshotyna aýdaryldy», dedi «Samuryq-Qazyna» AQ basqarma tóraǵasy Nurlan Jaqypov.
Aıta keteıik, vetnamdyq kompanııa Qazaqstandaǵy áýejaıdy satyp alýdy josparlap otyr. Vıse-premer Serik Jumanǵarınniń sózine qaraǵanda, jýyrda Qazaq Air áýe kompanııasyn satyp alǵan vetnamdyq SOVICO Group Qazaqstandaǵy áýejaılardyń birin basqarýǵa alýǵa nıetti. Kompanııa qarqyndy damyp keledi, halyqaralyq kelisimsharttary bar jáne Qazaqstandy negizgi strategııalyq alań retinde qarastyryp otyr.
Vetnam Qazaqstannyń Ońtústik-Shyǵys Azııadaǵy eń iri seriktesteriniń biri. 2023 jyly eki el arasyndaǵy taýar aınalymy 879 mln dollar boldy. Qazaqstan Vetnamǵa myrysh pen qorǵasyn eksporttasa, Vetnamnan tehnıka men daıyn ónimder ımporttaıdy. Sonymen qatar, elimizde Vetnamnan kelgen iri ınvestorlar jumys istep jatyr.
