Foto: Shymkent qalasynyń ákimdigi
Qala ákimdiginiń habarlaýynsha, 2025 jyly jalpy uzyndyǵy 40,8 shaqyrymdy quraıtyn 15 nysanda jol qurylysy men qaıta jańǵyrtý jumystary júrgizilmek. Onyń ishinde Qonaev dańǵylynyń jalǵasy 16,3 shaqyrymdy quraıdy jáne 6 kezeńge bólingen. Qazirgi ýaqytta 1, 3, 4 jáne 6-kezeńder aıaqtalǵan. 2 jáne 5-kezeńderdegi qurylys jumystary bıyl bastalyp, tıisinshe 2025 jáne 2026 jyldary aıaqtalady.
Sondaı-aq qaıta jańǵyrtylyp jatqan A-2 avtomobıl jolynyń uzyndyǵy – 28,2 shaqyrym, 8 kezeńnen turady. Búginde alǵashqy 4 kezeń aıaqtalyp, qalǵan 5, 6, 7, 8-kezeńderde qurylys jumystary júrip jatyr. 6, 7 jáne 8-kezeńderdi 2025 jyly, 5-kezeńdi 2026 jyly aıaqtaý josparlanǵan.
Qalanyń keptelisin azaıtý maqsatynda Báıdibek bı dańǵyly (Zoobaq – Bozaryq aınalma joly) boıynda Altynsarın kóshesiniń jalǵasy (Tólemetov kóshesinen Turan shaǵynaýdanyna deıingi aralyq) salynyp jatyr. Uzyndyǵy 2,3 shaqyrymdy quraıtyn bul jobanyń qurylysy 2026 jyly aıaqtalady.
Budan bólek, Jandosov kóshesiniń jalǵasy (Adyrbekov – Sasbuqaev kósheleri aralyǵy, uzyndyǵy – 400 m) men Asar jáne Shymsıtı shaǵynaýdandaryn baılanystyratyn (Túrkııa kóshesi men A-2 jolyn jalǵaıtyn, uzyndyǵy – 1,1 shaqyrym) jol qurylystary bıyl paıdalanýǵa beriledi.
Kólik keptelisterin joıý úshin qalada bıyl Tlenshın jáne Momynov kóshelerinde 2 temirjol ótkeliniń qurylysy júrip jatyr. Bul nysandardy 2026 jyly paıdalanýǵa berý josparlanǵan.
Bıyl 17,1 shaqyrymdy quraıtyn birqatar kóshelerde – Iýsýpov, Tamshybulaq, Jańa Qonys, Izendi, Iý.Saremı jáne Jańaqurylys kóshelerinde kúrdeli jóndeý jumystary júrgizilýde. Atalǵan jumystar 2025 jyly aıaqtalady.
Sonymen qatar, 2025 jyly uzyndyǵy 161,2 shaqyrym bolatyn 252 kóshede ortasha jóndeý júrgiziledi. Bul jumystar josparǵa sáıkes kezeń-kezeńimen oryndalyp jatyr.
2025 jyly Shymsıtı jáne Turan shaǵynaýdandarynda 6 jańa baǵdarsham, qala kóshelerinde qosymsha 25 baǵdarsham ornatý josparlanǵan. Jaıaý júrginshiler qaýipsizdigin arttyrý maqsatynda rettelmeıtin 487 ótkeldiń ishinen 200 oryn anyqtaldy, solardyń 100-ine qosymsha jaryqtandyrý ornatylady.
Kelesi jyly qala boıynsha 6 000 dana jol belgilerin ornatý jáne jańartý kózdelgen. Sonymen qatar, mektep, balabaqsha, emhana mańyndaǵy qaýipsizdikti kúsheıtý maqsatynda 1 200 metrge jasandy jol kedergileri ornatylady.
«2025 jyly qala kóshelerin 100% kóshe jaryq shamdarymen qamtylmaq.Búgingi tańda 80 turaqty marshrýttarda kúndelikti 949 avtobýs jolaýshylardy tasymaldaýda, onyń ishinde 79 marshrýt áleýmettik mańyzy bar marshrýt dep aıqyndalǵan. Atalǵan marshrýttarǵa 11 kólik kompanııasy qyzmet kórsetip jatyr. Jalpy kólikterdiń sany 1120 birlikti quraıdy, onyń ishinde 44 avtobýs 3 jylǵa deıin, 1060 avtobýs 5 jylǵa deıin jáne 7 jyldan asqan 16 avtobýs. Marshrýttarda qyzmet kórsetetin avtobýstardyń 100% GPS trekkerlermen jabdyqtalǵan. Bıyl jyly tasymaldaýshylar tarapynan 205 jańa avtobýstardy satyp alý kózdelýde, onyń ishinde gaz metandy paıdalanatyn 180 avtobýs jáne 25 shaǵyn avtobýs.Atalǵan avtobýstar eskirgen, talaptarǵa jaýap bermeıtiń avtobýstardyń ornyna aýystyrylady jáne jańa marshrýttarda qyzmet kórsetedi», delingen habarlamada.
