Kóp uzamaı Astana qalasynyń ákimdigi ardagerden keshirim surap, jaǵdaıdy túsindirýge tyrysqan. Qalanyń Jumyspen qamtý jáne áleýmettik qorǵaý basqarmasynyń basshysy Ilıa Skýb pen Ishki saıasat basqarmasynyń basshysy Nurdáýlet Álmuhanov Teńdik Izaqovtyń úıine arnaıy baryp, ol kisige uzaq jylǵy eńbegi úshin alǵys aıtyp, 9 mamyr kúni ótetin gúl shoqtaryn qoıý rásimine resmı túrde shaqyrǵan. Ákimdiktiń resmı habarlamasynda sherý alańyna kirýge arnalǵan tizim soǵys jáne tyl ardagerleriniń týystarynyń tikeleı ótinishi negizinde jasalǵany, al Teńdik Izaqovtyń otbasynan ondaı ótinish bolmaǵany aıtylypty.
Sonymen 93 jastaǵy ardager kim boldy? Ol – elimizdiń medısına salasyndaǵy kórnekti tulǵa. Teńdik aqsaqal Qazaqstandaǵy alǵashqy neırohırýrgterdiń biri retinde eldiń densaýlyq saqtaý júıesine ólsheýsiz úles qosqan azamat. 1932 jyly Qaraǵandy oblysy Qarqaraly aýdanynda dúnıege kelgen ol jastaıynan eńbekke aralasyp, aýyr kezeńderdi basynan ótkerdi. Keıin 1957 jyly Qaraǵandy medısınalyq ınstıtýtyn aıaqtaǵan soń shalǵaıdaǵy aýdandyq aýrýhanalarda jumys istep, keıin Almaty memlekettik medısına ınstıtýtynda qyzmet etti.
Osy kezeńde bet júıke aýrýyn emdeýdiń tyń tásili — gıdrotermodestrýksııa ádisin alǵash qoldanǵan dárigerlerdiń biri boldy. Bul ádis boıynsha naýqastyń bet júıkesine qaınaǵan sý jiberý arqyly aýyrsynýdy toqtatý múmkin boldy. Bul – dáldik pen tereń bilimdi talap etetin, táýekeli joǵary, biraq nátıjeli em. Onyń bul tásilin zamandastary da qaıtalap kórýge tyrysqan, alaıda dál osy sheberlikke jete almaǵan. Sondaı-aq Teńdik Izaqov emdeýmen qatar ǵylymı-zertteý jáne oqytýshylyqpen de aınalysyp, kóptegen jas mamannyń jolyn ashqan.
Ardagerdiń nemeresi Erlan Amangeldi atasy týraly bylaı dep tolǵanady:
«Ol ómir boıy neırohırýrg bolyp eńbek etti. Qazir 93 jasta, aqyl-esi tyń, óte belsendi. Áli kúnge deıin adamdarǵa keńes berip, dıagnoz qoıýǵa kómektesip otyrady. Rasynda bul kisi – uly adam!».
Teńdik Izaqovtyń ómirlik ustanymy – eńbek etý, onyń qudiretine sený.
«Baqyttyń kilti – eńbekte. Oı eńbegi, qol eńbegi bolady. Soǵan berile kirisý kerek. Eńbekten rýh alasyń. Qazaq kishkentaı bala eńbektedi dep beker aıtpaıdy. «Qaıǵy kelse qarsy tur, qulaı berme» deıdi Abaı. Sondyqtan kez kelgen qıyndyq adamdy shıratady. Sol sebepti árbir azamat eńbekke daǵdylaný kerek», deıdi ardager. Ol úshin eńbek – adamdy adam etetin, rýh beretin qundylyq.
Mine, osyndaı azamattyń áskerı sherýge kire almaı qalýy qoǵamda ádil syn týdyrdy. Degenmen, ákimdiktiń ýaqytyly jasaǵan qareketi – izettilik belgisi. О́ıtkeni az ǵana qalǵan ardagerlerdi alaqanda aıalap, qurmet kórsetý – bárimizdiń paryzymyz ekeni anyq. Endigi joly mundaı keleńsiz jaǵdaıdy boldyrmaýǵa tyrysý – el talaby bolyp otyr.
