Talapkerdiń aıtýynsha, ushaq Almatyǵa qonǵannan keıin áýejaı qyzmetkerleri koma jaǵdaıyndaǵy balany arba arqyly tasymaldaýdy usynǵan. Alaıda bul arba medısınalyq talaptarǵa saı bolmaǵan.
Balamen birge júrgen dáriger men ata-anasy arnaıy reanımobıl áýejaı aýmaǵyna kire almaǵan. Osy sebepti balany ushaqtan termınalǵa ambýlıftpen – qozǵalysy shekteýli jolaýshylarǵa arnalǵan quralmen jetkizgen. Biraq bul tehnıka aýyr háldegi naýqastarǵa arnalmaǵan.
Neırohırýrgtyń qorytyndysyna sáıkes, bala ózdiginen qozǵala almaıtyn jaǵdaıda bolǵan jáne pasporttyq baqylaýdan medısınalyq pýnkt arqyly ótýi qajet edi. Degenmen ol standartty jolmen – shekaralyq baqylaý men sýretke túsirý rásimi arqyly ótkizilgen.
Sot sheshiminde kórsetilgendeı, áýekompanııa balanyń jaǵdaıynan habardar bola tura, áýejaıǵa reanımobıl qajet ekenin eskertpegen. Qyzmetter arasyndaǵy baılanystyń bolmaýy qajetti kómektiń der kezinde kórsetilmeýine sebep bolǵan.
«Shekaralyq baqylaý kezinde keratıtpen aýyrǵan balanyń kózindegi qorǵanysh tańǵyshy májbúrli túrde alynyp, sýretke túsirilgen. Kelesi kúni bala aýrýhanaǵa ekijaqty pnevmotoraks dıagnozymen túsken. Aqpan aıynda ol qaıtys boldy», delingen sot materıaldarynda.
Sot talapty jartylaı qanaǵattandyryp, «E» dep belgilengen áýekompanııadan moraldyq zııan úshin 5 mıllıon teńge ótemaqy óndirý týraly sheshim shyǵardy. Alaıda bul úkim áli zańdy kúshine engen joq.
Aıta keteıik, sot qujattarynda áýekompanııa men áýejaıdyń naqty ataýy atalmaǵan – tek «E» áýekompanııasy» men «halyqaralyq áýejaı» dep kórsetilgen.
