Uzaq jyl kútken ıgilik

Quny 26,2 mlrd teńge bolatyn jobany eki kezeńde júzege asyrý josparlanyp, byltyr bastamasy retinde 187 kópqabatty turǵyn úıge ystyq sý jetkizý qolǵa alyndy. Buǵan Úkimet rezervinen 11 mlrd teńgeden astam qarjy qaraldy. Áýelgide sol jaq ja­ǵalaýdaǵy 5 kópqabatty úı men «Astana-1» shaǵyn aýdanyndaǵy 13 kópqa­batty úıge, S.Beıbarys kóshe­siniń boıyndaǵy 9 jáne Tasbóget kentindegi 5 úıge ystyq sý berildi. Sondaı-aq Odejda, Avtovokzal, Ýnıversam, Shuǵy­la, Syrdarııa shaǵyn aýdany turǵyndarynyń baspanalaryna da ystyq sý jetti. Otyz jyldan beri sý jylytqysh paıdalanyp otyrǵan úılerge qubyr tartylyp, páterlerge eseptegish quraldary ornatyldy. Naýryz aıynyń basynda ystyq sýǵa qol jetkizgen kópqabatty úı sany 104-ke jetti.

Mamandar esebinshe, sý ysytqysh qondyrǵy arqyly 50 lıtr sýdy ysytýǵa orta esep­pen kúnine 2 kVt ketedi eken. Sonda bir aıda elektrli ysyt­qyshqa shamamen 1 565,6 teńge tóleıdi. Jylý energııasy arqyly keletin ystyq sýdyń 1 tekshe metri – 172,03 teńge. Jalpy ortalyqtandyrylǵan ystyq sýdyń tıimdiligi 66,2% bolyp otyr. Onyń syrtynda, kópqabatty úılerde elektr nemese gazben jylytý qurylǵy­laryn paıdalanýdyń aqyry tótenshe jaǵdaılarǵa da ákelýi múmkin.

Ystyq sý jelisine sapasy joǵary materıaldar, tanymal eýropalyq óndirýshilerdiń jab­dyqtary qoldanylady. «Bul ystyq sý júıesiniń senimdi, úzdiksiz jumysyn qamtamasyz etedi», deıdi «Baıqońyr» áleý­mettik-kásipkerlik korporasııasy basqarma tóraǵasynyń keńesshisi Muhıtjan Kárimbaev.

Jalpy, qalada ystyq sý júıesi 1986–1987 jyldary ju­­mysyn toqtatypty. Sodan bergi ýaqyt ishinde ár­kim páterine jylytqysh ornatyp, amaldap keldi. Bul máseleni sheshý maqsatynda biraz jyl buryn qanatqaqty joba da qolǵa alynǵan bolatyn. Biraq ondaǵan jyl paıdalanylmaǵandyqtan ábden tozǵan ınjenerlik jelilerdi jańartýdyń joly tabylmaı, ol da aıaqsyz qalyp edi. Sondyqtan da Memleket basshysynyń qol­daýymen byltyrdan bas­talyp, jurt nátıjesin kóre bas­taǵan bul bastamany el uzaq jyl kút­ken ıgilik desek, artyq bolmas.

Qazir berilgen tapsyrma­lardyń oryndalýy qatań baqy­laýǵa alynyp, jaýapty bas­shylarǵa merdiger mekemelermen kúndelikti baılanysta bolý mindetteldi. Bıyl jos­par boıynsha 236 turǵyn úı sý júıesine qosylýy kerek. Birinshi kezekte atqarylatyn jumystarǵa jaqynda oblys bıýdjetine Úkimet rezervinen 5 mlrd teńge bólindi. Osylaısha, Qyzylorda qalasyndaǵy 423 kópqabatty turǵyn úıi orta­lyqtandyrylǵan ystyq sýmen jabdyqtaý júıesine qosylatyn kún jaqyndap keledi.

QYZYLORDA