Jedel izdestirý is-sharalary aıasynda atalǵan aýdanda birqatar mal urlyǵyna qatysy bar úsh er adam ustaldy.
Tergeý isiniń bastalýyna Bereke aýylynan 8 shaqyrym jerde ornalasqan jaıylymnan iri qara maldyń joǵalǵany týraly jergilikti turǵynnyń ótinishi sebep bolǵan. Jábirlenýshige keltirilgen jalpy shyǵyn kólemi 2,4 mıllıon teńgeni quraıdy. Atalǵan fakt boıynsha qylmystyq is tirkelip, sotqa deıingi tergeý amaldary bastaldy.
«Jedel is-sharalar barysynda Bereke aýylynyń mańynda polısııa qyzmetkerleri «Volkswagen Jetta» avtokóligin toqtatty. Avtokólik salonynda eki adam bolǵan, kólikti tekserý kezinde sıyr malynyń eki tutas eti, tegis uńǵyly myltyq, balta jáne as úı pyshaqtary tabylyp, tárkilendi. Keıin tártip saqshylary qylmystyq toptyń taǵy bir múshesin ustady. Kúdiktilerdiń úsheýi de ýaqytsha ustaý ızolıatoryna qamaldy», dep habarlaıdy oblystyq polısııa departamentiniń ókili.
Qazirgi ýaqytta bul toptyń 10-nan astam mal urlyǵyna qatysy bary dáleldendi. Olardyń aımaqtaǵy osyǵan uqsas basqa da qylmystarǵa qatysy bar-joǵyn anyqtaý úshin tergeý amaldary júrgizilýde.
Almaty oblysy
