Keneptegi syrly boıaýlar janǵa jylylyq syılaıdy. Jarqyn palıtra, taqyryp tańdaýdaǵy batyldyq ómirdiń araıly sátterin qanyq túske boıap, baǵalaı bilgen janǵa tirshiliktiń ár mınýty qaıtalanbas qýanysh ekenin umytpaýǵa shaqyrady. Sýretshilerdiń obrazdyq paıymdaýlarynan ónerdiń órisi sonshalyqty keń ekenin kóresiz. Keskindeme, grafıka janrlarynda oryndalǵan 100-ge jýyq shyǵarmanyń taqyryby ortaq bolǵanymen, aıtar oıy san alýan.
Rasymen de, ár sýretshiniń dúnıeni qabyldaýy bir-birine uqsamaıdy. «Sýdaǵy sheńberler» taqyrybyna boılaǵan sheberler bul qubylysty realıstik turǵydan ǵana emes, fılosofııalyq jáne ekologııalyq kózqaraspen de beıneleýge kúsh salǵan. Sý betine taralǵan sheńberler – keńistikke taralatyn oılar sekildi sezimderdi oıatyp, estelikter týdyrady. Bul adamzattyń tabıǵatqa, qorshaǵan ortaǵa degen súıispenshiligi men baıypty qarym-qatynasyna arnalǵan tolǵamdar toptamasy.
«Sheńber – árqashan ómirdiń belgili bir tepe-teńdigin saqtaıtyn tabıǵat úılesimi. Ol tabıǵat aıasyndaǵy sý áleminde kenetten paıda bolyp, kózden ǵaıyp bolyp ketetin qubylystardyń máńgilik aınalymy. Sýdyń betine jaıyla taralǵan sheńber – óziniń máni boıynsha jerdegi ómirmen, al tabıǵattaǵy aınalym «bıosentrızmmen» tikeleı baılanysty. Ár kóktem saıyn sýretshiler júrekterinen shyqqan jańa óner týyndylaryn jaryqqa shyǵarady jáne jyl saıyn kórmeniń taqyryby ózgerip turady», deıdi joba avtorlary.
ALMATY
