«Aıbar» jobasyna jatatyn shaǵyn kúzet kemesin oraldyqtar 16 mamyr kúni Shaǵan ózeniniń Jaıyqqa quıar saǵasyndaǵy arnaıy aılaqta saltanatpen shyǵaryp saldy. Jańa keme teńizde el shekarasyn kúzetip qana qoımaı, kontrabandanyń joly kesedi, zańsyz balyq aýlaýshylardy quryqtaıdy. Korabldiń uzyndyǵy – 27,3 metr, eni – 6,62 metr. Zamanaýı baılanys jáne navıgasııa qondyrǵylarymen jabdyqtalǵan keme saǵatyna 38-40 ýzel, bul shamamen 70-75 km/saǵatqa teń, bul jyldamdyǵy joǵary sanattaǵy sý kóligi degen sóz. Bir saparynda 600 mılge deıin, ıaǵnı 1 myń shaqyrymǵa deıin júre alatyn keme 15 adamǵa arnalǵan.
- Bul is-sharanyń máni erekshe, sebebi Memleket basshysy Qasym-Jomart Toqaev 2025 jyldy Qazaqstanda Jumysshy mamandyqtar jyly dep jarııalaǵany onyń mańyzyn arttyra túsedi. Jańa kemeniń iske qosylýy – bilimi men sheberligi eldiń qorǵanys áleýetiniń negizi sanalatyn ınjenerlerdiń, dızaınerlerdiń, keme jasaýshylardyń jáne jumysshylardyń jumysynyń aıqyn nátıjesi. Bul joba qaýipsizdikti qamtamasyz etýge qosqan úles qana emes, sonymen qatar memlekettiń damýyndaǵy jumysshy mamandyq ıeleriniń rólin moıyndaýdyń aıqyn úlgisine aınalmaq. Bul keme memlekettik shekaramyzdy kúzetýge jáne qorǵaýǵa arnalǵan. Osynyń arqasynda zańsyz keme qatynasyna, kontrabandalyq operasııalarǵa, ruqsatsyz balyq aýlaý, shekarany zańsyz kesip ótý jáne basqa qaýip-qaterge tosqaýyl qoıylady, - dedi Batys Qazaqstan oblysynyń ákimi Narıman Tóreǵalıev.
«Semeı» kemesi – otandyq mamandardyń kóp jylǵy eńbeginiń taǵy bir jemisi deıdi mamandar. 1941 jyly negizi qalanǵan Oraldaǵy «Zenıt» zaýyty elimizdiń qorǵanys ónerkásibi keshenindegi negizgi kásiporynnyń biri. Táýelsizdik jyldary memlekettik qorǵanys tapsyrystaryn turaqty oryndap, joǵary tehnologııalyq qaıyqtar men «Suńqar», «Búrkit», «Barys» jáne t.b arnaıy maqsattaǵy kemelerdi shyǵarǵan zaýyt ujymy osy «Semeı» kemesin 2 jyldan asa ýaqyt ishinde qurastyryp shyqqan.
- Búgingi saltanatty sátti paıdalana otyryp, kemeni jobalaýǵa, qurastyrýǵa jáne jabdyqtaýǵa atsalysqan barlyq qyzmetkerge shyn júrekten alǵysymdy bildirgim keledi. Sizderdiń kásibı sheberligińizdiń, adal eńbegińiz ben joǵary jaýapkershiligińizdiń arqasynda búgin biz elimizdiń ıgiligine qyzmet etetin taǵy bir kemeni sýǵa jiberip otyrmyz, - dedi Narıman Tóreǵalıuly.
Jańa kemeniń kapıtany aǵa leıtenant Jetkergen Aıdarov 2022 jyly Reseıdiń Baltyq áskerı-teńiz ınstıtýtyn bitirip, Mańǵystaýda shekara qyzmetinde shyńdalǵan sarbaz eken.
- Bul – shapshań qımyldy, sý jańa tehnıkalyq quraldarmen jabdyqtalǵan keme. Munda «Adýnok» dep atalatyn qashyqtan basqarylatyn avtomatty zeńbirek ornatylǵan. Keme bortynda shaǵyn katerimiz de bar, bul teńizdiń taıyz jerinde qoldanýǵa kerek, - deıdi kapıtan.
«Zenıt» zaýytynyń bas dırektory Qydyrjan Muqanov buǵan deıin «Aıbar» jobasyna jatatyn eki keme jasalǵanyn, olar teńizdegi qyzmetin abyroımen atqaryp júrgenin aıtady. «Semeı» kemesiniń ereksheligi – keme ekıpajy 10 kúnge deıin esh jerge soqpaı júre alady. 6 baldyq daýylǵa shydas beredi. Zaýyt dırektory qazirgi tańda sýdaǵy syıymdylyǵy 750 tonnalyq kópbeıindi keme jasalyp jatqanyn habarlady. Ol kelesi jyly paıdalanýǵa berilmek.
Batys Qazaqstan oblysy
