25-aptada dúnıege kelgen náreste naýryz aıynyń basynda ortalyqtyń jańa týǵan balalardyń qaruyndy terapııa bólimshesine jetkizildi. Onyń salmaǵy nebári 655 gramm, boıy – 28 santımetr boldy. Zerttep-qaraý nátıjesinde dárigerler «ashyq arterııalyq ózek» (týa bitken júrek aqaýy) dıagnozyn qoıyp, oǵan qosa respıratorlyq dıstress-sındromdy anyqtady.
Sábıdiń jaǵdaıy asa aýyr bolǵandyqtan, ol birden ókpeni jasandy jeldetý apparatyna qosyldy. Dıagnozdyń kúrdeliligine baılanysty perınataldyq ortalyqtyń dárigerleri birneshe ret qaladaǵy kardıohırýrgtarmen keńesti.
Sábıge 45 kún tolyp, salmaǵy 1 kelige jetkende, dárigerler júregine operasııa jasaý týraly sheshim qabyldady. Ashyq arterııalyq ózekke jasalǵan kúrdeli jáne asa dáldikti qajet etetin bul operasııa sátti ótti.
Operasııany Shymkent qalalyq balalar klınıkalyq aýrýhanasynyń kardıohırýrgi Asan Jumanov pen Shymkent qalalyq perınataldyq ortalyǵynyń anestezıolog-reanımatology Aqjol Ábdiraıymov jasady.
Qazirgi tańda sábıdiń jaǵdaıy turaqty aýyr. Ol perınataldyq ortalyqtyń bas dárigeriniń neonataldyq qyzmet jónindegi orynbasary Gúlmıra Býdýkova men neonatolog-reanımatolog Erasyl Shábetov bastaǵan neonataldyq reanımasııa bólimshesi dárigerleriniń turaqty baqylaýynda.
